Монгол Улс ЮНЕСКО-гийн хорооны гишүүнээр АНХ УДАА сонгогдлоо
Парис хотноо чуулж буй ЮНЕСКО-гийн Соёлын биет бус өвийг хамгаалах Конвенцийн талуудын Ерөнхий Ассамблейн 5 дугаар чуулганы үеэр ЮНЕСКО-гийн Соёлын биет бус өвийг хамгаалах Засгийн газар хоорондын Хорооны 2014-2018 оны гишүүнээр Монгол Улс анх удаа сонгогдлоо.
Хорооны нийт 12 гишүүнийг нууц санал хуралтаар сонгосон бөгөөд бусад гишүүнээр Алжир, Афганистан, Болгар, Конго, Кот д’ Ивуар, Сант Лючия, БНСУ, Турк, Унгар, Энэтхэг, Этиоп улс тус тус сонгогдсон байна.
Монгол Улс ЮНЕСКО-гийн Соёлын биет бус өвийг хамгаалах Конвенцийг 2005 онд соёрхон баталсан.
Өнгөрсөн хугацаанд Хүн төрөлхтний соёлын биет бус өвийн Төлөөллийн жагсаалтад:
- Морин хуур хөгжмийн уламжлалт урлаг
- Монгол Ардын уртын дуу
- Монгол Үндэстний баяр - Наадам
- Монгол Үндэстний хөөмэйн урлаг
- Бүргэдийн баяр буюу Шувуучлахуй
- Монгол гэрийн уламжлалт урлал, зан үйл зэргийг бүртгүүлсэн юм.
Харин Монгол Тууль, Ардын бүжгийн урлаг: Бий биелгээ, Монгол цуур хөгжмийн уламжлалт урлаг, лимбэчдийн уртын дуу хөгжимдөх уламжлалт арга барил-битүү амьсгаа, Монгол уран бичлэг зэргийг Яаралтай хамгаалах шаардлагатай соёлын биет бус өвийн жагсаалтад бүртгүүлээд байгаа билээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
