"Электрон тамхийг тамхи гэх нэр томьёонд оруулж, онцгой албан татварт хамааруулан, өрөө тасалгаанд татахыг хориулмаар байна"
Нийгмийн эрүүл мэндийн төв /НЭМҮТ/-өөс "Бүх төрлийн тамхи хортой" сэдвээр хэвлэлийн баг хурал зохион байгуулж дараах мэдээллийг өглөө.
Энэ үеэр Тамхины хяналтын тухай хуулийг батлуулахыг эрүүл мэндийн салбар дэмжиж байгаа. Электрон болон янжуур тамхи хоёулаа ялгаагүй хортой гэдгийг НЭМҮТ-ийн Эрүүл мэндийг дэмжих алба /ЭМДМА/-ны дарга С.Гэрэлмаа онцлов.
НЭМҮТ-ийн Эрүүл мэндийг дэмжих алба /ЭМДМА/-ны дарга С.Гэрэлмаа "Хэдий чинээ бага наснаасаа эхэлж тамхи татна төдий чинээ өвчлөлд өртөх нас нь эрт байна. 13 наснаасаа татаж эхэлсэн бол 23 хан насандаа хорт хавдраар өвдөх, зүрх судасны өвчнөөр өвдөх эрсдэл нь илүү байна. Залуу хүмүүс гэнэт нас бардаг, унтаад сэрээгүй тохиолдлуудын өвчний түүхийг судалж үзвэл тамхи татдаг байсан байдаг" гэв.
Судлаач Л.Дэлгэрзул "Бүх төрлийн тамхи дотроо хортой бодистой. Утаа агаар дээр гарч ирсний дараа агаар дээр байсан бусад бодисуудтай урвалд орж дараагийн хортой бодисыг үүсгэж хавдар төрүүлэгч ялгаруулах боломжтойг судлаачид судалж байгаа.
Электрон тамхинаас ялгарч байгаа бодисуудын 60-70 хувь нь агаарт цацагддаг. Иймд өрөө, тасалгаанд электрон тамхи татахыг хорихыг хүсэж байгаа" гэв.
"Энэ бүх хүчин чармайлт УИХ дээр унавал Монгол Улсад эмгэнэлтэй зүйл болно"
Анагаах Ухааны доктор, дэд профессор Н.Эрдэнэхүү "Электрон тамхины хувьд өдөрт сорох соролтын хэмжээ өндөр байгаа учраас тэр хэрээрээ хүний бие рүү орж байгаа бодисын тунгийн хэмжээ, донтолт зэрэг нь илүү өндөр байна.
Гаалиар орж ирж байгаа электрон тамхинд агуулагдах никотины хэмжээ ихэнх нь 3-6 хувьтай байна. Энгийн янжуур тамхинд дээд тал нь л 1.2 мл хэмжээний никотин байдаг. Энэ нь энгийн иргэд, ирээдүйн иргэдийг хамааралтай болгох, донтуулах чиглэл рүү оруулж байна. Улмаар насан туршийн үйлдвэрлэлийн баталгаа болох хэрэглэгч нараа бий болгож байгаа юм.
Хил гаалиар зарим төрлийн мансууруулах бодисын шинжтэй зүйлүүд электрон тамхины шингэнд орж ирсэн. Өсвөр үеийнхэн энэ тамхийг татах таатай нөхцөлийг Засгийн газар бүрдүүлж байна. Тиймдээ ч тамхины татварыг нэмж ядахнаа 60 хувьд хүргэнэ гэсэн анхны ажлын хэсгүүдийн тооцоолол байсан. Хэрэв энэ бүх хүчин чармайлт УИХ дээр унавал Монгол Улсад эмгэнэлтэй зүйл болно" гэв.
Монгол Улсад зохицуулагдаж эхлээгүй байсан электрон тамхийг "тамхи" гэх нэр томьёонд оруулж, онцгой албан татварт хамааруулахын тулд энэ хуулийг батлуулахыг дэмжиж байгаагаа илэрхийлэв.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
