Тайландын Засгийн газар жагсагчидтай хэлэлцээ хийж эхэллээ
Тайландын Засгийн газар Бангкок хотод болон бусад мужид эсэргүүцлийн үйл ажиллагаа зохион байгуулж буй Ардын ардчилсан шинэчлэлийн хорооны төлөөлөгчидтэй хэлэлцээ хийж эхэлжээ.
Тус улсын Үндэсний аюулгүйн зөвлөлийн тэргүүн Парадорн Паттанатабутын мэдээлснээр хэлэлцээ хийх төлөөлөгчдийн жагсаалтад Тайландын үндэсний цагдаагийн газрын тэргүүн болон хүчний хэд хэдэн хүн багтсан гэнэ.
Хэлэлцээрийн гол зорилго бол Чаенг Ваттана дүүрэгт төрийн байгууллагуудад босгосон хаалтыг буулгах гэж “ИТАР-ТАСС” агентлаг дамжууллаа. Ингээд жагсагчдад шийдвэр гаргах 24 цагийн хугацаа өгөх юм байна.
Бангкок хотноо энэ сарын 13-наас хойш хэд хэдэн чухал объектууд хаагдаад байгаа юм. Нийслэлийн төв хэсэгт 24 цаг байрлах сөрөг хүчнийхний тоо бага байна. Гэвч цагдаагийнхан Чаенг Ваттана дүүргийн тавьсан хаалтыг буулгаж хүчрэхгүй байгаа аж.
Тайландад сүүлийн гурван сарын турш үргэлжилж буй эсэргүүцлийн арга хэмжээний улмаас нийтдээ 10 хүн амиа алдаж, 560 гаруй нь гэмтэж бэртжээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
