₮3.7 тэрбумын төсөвт өртөгтэй, Морингийн давааны 1.5 километр авто зам жилийн дараа ашиглалтад орлоо
Хан-Уул дүүргийн 12 дугаар хороо, Морингийн давааны замаас “Барилгын хатуу хог хаягдал дахин боловсруулах үйлдвэр” хүртэлх 1.5 км урт авто зам ашиглалтад оржээ. Авто замын ажлыг 2025 онд эхлүүлж байсан юм.
Тус зам нь хоёр эгнээтэй, зорчих хэсгийн өргөн нь долоон метр бөгөөд хоёр талаараа явган хүний зам, гэрэлтүүлэгтэй, ус зайлуулах хоолойтой баригджээ.
Уг авто замаар “Барилгын хатуу хог хаягдал дахин боловсруулах үйлдвэр” рүү явж буй хүнд даацын тээврийн хэрэгсэл зорчих зориулалттайгаар суурийг цементээр бэхжүүлжээ. Өөрөөр хэлбэл ачааны автомашинууд шороон замаар бус хатуу хучилттай замаар хөдөлгөөнд оролцох болж байна.
Авто замын барилгын ажлыг “Эко эвсэг зам” ХХК гүйцэтгэжээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
