Манай хоккейчдын бахдам амжилт үргэлжилсээр...
Олон Улсын Хоккейн Холбоо (IIHF)-ноос зохион байгуулдаг хоккейн Дэлхийн Аварга Шалгаруулах Тэмцээн (ДАШТ) III дивизионы тэмцээнд манай улсын шайбатай хоккейчид өрсөлдөж буй.
Энэ сарын 27-ноос тавдугаар сарын 3-ныг дуустал үргэлжлэх тус тэмцээний "B" хэсэгт зохион байгуулагч Мексик, Хойд Солонгос, Хонконг, Филиппин, Сингапур болон доод зиндаанаас дэвших болзол хангасан Монголын баг "А" хэсэг рүү орох эрхийн төлөө хүч үзэж байгаа юм.
Манай залуус эхний тоглолтод Филиппинийг 13:7, дараа нь Сингапурыг 11:1-ээр ялснаар хэсгээ зургаан оноотой, гоолын зөрүүгээр Хойд Солонгосын ард хоёрдугаарт бичигдэж байна.
Маргааш буюу энэ сарын 30-нд Хойд Солонгосын багтай өрсөлдөх бол тавдугаар сарын 2-нд зохион байгуулагч орон Мексик, 3-нд нь Хонконгийн багтай өрсөлдөнө.
Энэ тэмцээнд хэсгээ тэргүүлсэн баг нь 2026 оноос "А" хэсэгт өрсөлдөх эрхтэй болно. Энэ жилийн хувьд Киргизийн шигшээ баг 15 оноогоор хэсгээ тэргүүлснээр ирэх жилээс хоёрдугаар лигт өрсөлдөх эрхээ авсан. Харин Туркменистан, Турк, Өмнөд Африк болон Босни ба Херцеговин нар хэсэгтээ үлдэж, таван тоглолтоос гурван оноо "зулгаасан" Люксембургийн шигшээ баг ирэх жил зиндаа буурах аж.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
