Ж.Эрдэнэбат: Эрээнд ирсэн автобуснуудын бүрэн бүтэн байдлыг шалгаагүй. Асаж байсан
Ногоон автобусны шүүх хурал зургаа дахь өдрөө Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны тойргийн шүүхэд болж байна.
Шүүгдэгч А.Ганхуяг нарын 24 хүнд холбогдох /Эрүүгийн хэргийн 22.1-1, 17.3-2.2, 22.12-1/ хэргийн шүүх хуралдаан өнөөдөр 13:30 цагт эхэлсэн.
Энэ үеэр улсын яллагч шүүгдэгч Ж.Эрдэнэбатаас дараах асуултыг асууж, хариулт авав.
Улсын яллагч: Та "Тэнүүн-Огоо" компанид ямар албан тушаал хашдаг вэ. Хэдэн жил энэ компанид ажилладаг вэ?
Шүүгдэгч Ж.Эрдэнэбат: "Тэнүүн-Огоо" компанид 15 жил ажиллаж байгаа. Техник хариуцсан гүйцэтгэх захирлаар ажилладаг.
Улсын яллагч: "Тэнүүн-Огоо" компаниас 2023 оны хоёрдугаар сарын 6-ны хууль тогтоомжийн хэрэгжилтийг хангах тухай албан бичиг таны нэр дээр иржээ. Евро-5 төхөөрөмжтэй автобус нийлүүлэх боломжтой гэсэн тийм үү?
Шүүгдэгч Ж.Эрдэнэбат: Миний нэр дээр бичигнүүд ирдэг.
Улсын яллагч: Уг албан бичигт Евро дизель хөдөлгүүрийн автобусанд нэмэлт төхөөрөмж суурилуулан өөрчлөх боломжтой гэсэн агуулга байсан уу. Тэр Евро-2 биш, Евро-5 дизель хөдөлгүүрийн автобус нийлүүлнэ гэсэн албан бичиг юм уу?
Шүүгдэгч Ж.Эрдэнэбат: Евро-2 хөдөлгүүрт нэмэлтээр тоног төхөөрөмж суурилуулаад Евро стандартын шаардлага хангасан хөдөлгүүртэй автобус оруулж ирнэ гэсэн бичиг.
Улсын яллагч: Тэгвэл Евро-2 дизель хөдөлгүүртэй автобус нийлүүлнэ гэсэн албан бичиг гэж ойлгож болох уу?
Шүүгдэгч Ж.Эрдэнэбат: Евро стандартын шаардлага хангасан автобус нийлүүлэх.
Улсын яллагч: Нэмэлт гэрээ байгуулахдаа "Тэнүүн-Огоо" компани их багтаамжийн ямар дизель хөдөлгүүртэй автобус оруулж ирэхээр тохиролцсон юм бэ?
Шүүгдэгч Ж.Эрдэнэбат: Евро стандартын шаардлага хангасан.
Улсын яллагч: Евро 2, Евро 3-ын аль хөдөлгүүр нь юм бэ?
Шүүгдэгч Ж.Эрдэнэбат: Евро-2 стандартын шаардлага хангасан хөдөлгүүр. Би энэ гэрээг байгуулахад өвчтэй байсан. Гарын үсэг зурсны дагуу очиж хоёрдугаар гарын үсгийн гэрээнд зурсан.
Улсын яллагч: Гэрээний хавсралтаар батлагдсан техникийн тодорхойлолтод ямар дизель хөдөлгүүртэй автобус нийлүүлэхээр тусгагдсан байсныг мэдэж байгаа юу?
Шүүгдэгч Ж.Эрдэнэбат: Мэдэхгүй.
Улсын яллагч: Гаалийн мэдүүлэгт 100 автобусыг Евро хэд хөдөлгүүртэй гэж мэдүүлсэн юм бэ?
Шүүгдэгч Ж.Эрдэнэбат: Евро-2
Улсын яллагч: Автобусыг Вьетнамаас усан боомтоор тээвэрлэн хүлээн аваад Монгол Улсын нутаг дэвсгэр рүү оруулсан, тийм үү?
Шүүгдэгч Ж.Эрдэнэбат: Орж ирснийг хүлээн авсан. Замын-Үүд дээр орж ирэхэд нь хүлээн авсан. Ирсэн автобусыг Эрээн хотод хараад жолооч нараар жолоодуулаад Замын-Үүд рүү оруулж ирсэн.
Улсын яллагч: Нэг бүрчлэн хүлээн авсан гэж ойлгож болох уу?
Шүүгдэгч Ж.Эрдэнэбат: Ирсэн автобуснуудыг жолооч хуваарилж, жолоодоод Замын-Үүдэд оруулсан.
Улсын яллагч: Тэгвэл тухайн автобуснуудын бүрэн бүтэн байдал, төхөөрөмж, тухайн нөхцөл байдлыг шалгаагүй гэж ойлгож болох уу?
Шүүгдэгч Ж.Эрдэнэбат: Болно. Асаж байгаа бэлэн автобусыг шууд унаад оруулсан.
Улсын яллагч: Таныг хүлээж авахад тухайн автобусууд ямар дизель хөдөлгүүртэй байсан юм бэ?
Шүүгдэгч Ж.Эрдэнэбат: Тэрийг үзээгүй. Үзэх боломж байгаагүй.
Улсын яллагч: Тухайн автобусанд Евро-5 гэсэн наалт байсан уу?
Шүүгдэгч Ж.Эрдэнэбат: Байсан.
Улсын яллагч: Гурван удаагийн хүлээн авалтаар 100 автобус оруулж ирсэн шүү дээ. Бүх автобусанд Евро-5 гэсэн наалт байсан уу?
Шүүгдэгч Ж.Эрдэнэбат: Бүгдэнд нь наалт байсан.
Улсын яллагч: Та гаалийн мэдүүлэгтээ Евро-2 гэж мэдүүлсэн байна. Гэтэл автобус өөрөө Евро-5 наалттай хүрээд ирсэн байдаг. Энэ талаар "Эктэ", "Daewoo" компани руу хэлсэн зүйл байгаа юу?
Шүүгдэгч Ж.Эрдэнэбат: Хэлээгүй. Ерөөсөө автобус гааль дээр ирэхэд нь дагалдах бичиг баримт нь хүрээд ирдэг. Тэр бичигт компанийн албан бичиг гаргаж өгөөд ийм автобусууд ирсэн тул гаалийн бүрдүүлэлт хийж өгнө үү гэсэн албан бичиг өгдөг.
Улсын яллагч: Таны зүгээс компанийн ерөнхий захирал А.Ганхуягаас "Евро-2 автобус гэж мэдүүлсэн байтал яагаад Евро-5 гэсэн наалттай байна" гэдгийг лавласан уу?
Шүүгдэгч Ж.Эрдэнэбат: Үгүй. Цаанаасаа наалттай ирсэн. Тухайн үед үүнийг анзаарах зав байгаагүй.
Улсын яллагч: Нийслэлийн Нийтийн Тээврийн Газар эсвэл Нийслэлийн Худалдан авах газар зэрэг төрийн байгууллагуудад мэдэгдсэн үү?
Шүүгдэгч Ж.Эрдэнэбат: Үгүй.
ВИДЕО:
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
52 СЭТГЭГДЭЛТЭЙ
|
