"Цэргээс гэртээ иртэл ээж, гурван дүү чинь угаартаад бурхан болчихлоо гэж хэлсэн. Маш их гомдолтой байна"

Гэрэл зургийг MPA агентлагийн онцгой зөвшөөрөлтэйгөөр ашиглав

БГД-ийн 22-р хороонд 1-р сарын 23-24-нийг шилжих шөнө нэг гэр бүлийн зургаан хүн угаартсаны улмаас нас барсан талаар тус гэр бүлээс ганцаараа үлдсэн цэрэгт явсан хүү нь цэргээс чөлөөгөөр ирээд өнөөдөр мэдээлэл өглөө. 

Тус байшинд хоёр том хүн, дөрвөн хүүхэд харамсалтайгаар угаартаж нас барсан байна. 

Тэрбээр "Надад маш гомдолтой байна. Тухайн өдөр манай гэрт манай хамаатны ах, ахын бага охин болон миний ээж, гурван дүү маань байсан. Хамаатны болон миний дүү нар 6, 9, 10, 17 настай байсан. 

Би эхлээд юу болсныг мэдээгүй цэргээс гэртээ ирсэн. Гэтэл манай хамаатнууд намайг сэтгэлээ бариарай, гэр рүүгээ тайван ороорой гэж хэлсэн. Гэртээ ортол манай хамаатны ах "Сэтгэлээ бариарай миний дүү ээж, гурван дүү чинь угаартаад бурхан болчихлоо" гэж хэлсэн. 

Манай хамаатнуудаас цагдаа 2-3 цаг мэдүүлэг авч мэдээлэл өгч болохгүй тухай гарын үсэг зуруулсан байсан. Шүүхийн шийдвэр гараагүй учир яриа өгч болохгүй гэсэн. 

Улсаас зургаан хүний оршуулгын зардалд нийт 5 сая төгрөг өгсөн байсан. Өмнө нь манайх нүүрс түлдэг байсан ч угаарын асуудал гарч байгаагүй. 

Миний хувьд цэрэгт явсан хойгуураа гэр бүлийн бүх гишүүнээ алдчихлаа. Маш их гомдолтой байна. Дүү нар маань юугаа ч мэдэхгүй насан дээрээ явж байгаад өөд болчихлоо шүү дээ. Манайх ч гэлтгүй олон айлууд хохирч байна шүү дээ. Ээж маань үйлчлэгч хийдэг байсан. Том дүү маань коллежийн оюутан байсан. 

Нүүрс түлж амьдарсны төлөө ингэж хохирч байгаа нь зүгээр юм уу? Гомдолтой байна. Мэдээлэл хийж болохгүй, хуулийн хариуцлага хүлээлгэнэ гэсэн ч миний хувьд ээж, дүү нарынхаа төлөө бүх зүйлийг хийнэ гэж бодож байна. Хуульч, өмгөөлөгч нар надад хууль зүйн туслалцаа үзүүлэхийг хүсэж байна. Боломжоороо надад тусалж өгөөч ээ гэж хэлмээр байна" гэв.