Гэр бүлийн хүчирхийллийн хэрэгт яллагдагчаар татагдсан НИТХ-ын төлөөлөгч Б.Эрдэнэсүхийн шүүх хурал хойшилжээ

Н.Эрхбаяр, iKon.mn

0 минутын өмнө

iKon.MN

Гэрэл зургийг MPA агентлагийн онцгой зөвшөөрөлтэйгөөр ашиглав

Эхнэрээ зодож, гэр бүлийн хүчирхийлэл үйлдсэн гэх Нийслэлийн Иргэдийн Төлөөлөгчдийн Хурал (НИТХ)-ын төлөөлөгч Б.Эрдэнэсүхтэй холбоотой эрүүгийн хэргийн шүүх хурал Баянгол, Хан-Уул, Сонгинохайрхан дүүргийн Эрүүгийн хэргийн анхан шатны тойргийн шүүхэд өнөөдөр боллоо.

Хаалттай явагдсан өнөөдрийн шүүх хурлын үеэр хэргийн оролцогч талаас хойшлуулж өгөх хүсэлт гаргажээ. Тус хүсэлтийн дагуу шүүх хурлыг есдүгээр сарын 18-н хүртэл хойшлуулсан байна.

Б.Эрдэнэсүхийг Эрүүгийн хуулийн тусгай ангийн 11.7 дугаар зүйл.Гэр бүлийн хүчирхийлэл үйлдэх, 13.12 дугаар зүйл.Хууль бусаар мөрдөж мөшгөх гэх хоёр зүйл заалтаар яллагдагчаар татан, хэргийг нь шүүн хэлэлцэж байгаа юм.

Яллагдагч Б.Эрдэнэсүхийг гэр бүлийн хамаарал бүхий харилцаатай хүн болох эхнэр О.Нарангаравыг 2024 оны 11 дүгээр сараас 2025 оны 6 дугаар сарын 23-ны өдрийн хооронд зодож харгис хэрцгий хандсан, дээрх гэмт хэргийг өөрийн төрсөн хүүхдүүд болох Э.Н, Э.Ц, Э.Ц нарын эсрэг үйлдсэн, мөрдөн шалгах ажиллагаа явуулах эрхгүй атлаа эхнэр О.Нарангаравыг хянах зорилгоор 2025 оны 6 дугаар сард Хан-Уул дүүргийн 21 дүгээр хороо, 265 дугаар байрны гадна талын автомашины шороон зогсоол дээр байрлуулсан Лексус 470 маркийн 26-16 УАР улсын дугаартай тээврийн хэрэгсэлд ML 150 загварын, 99202222 дугаартай байршил тогтоох зориулалт бүхий төхөөрөмж байршуулж мөрдөн мөшгөсөн гэмт хэргүүдэд холбогдуулан Нийслэлийн прокурорын газрын хяналтын прокуророос яллах дүгнэлт үйлдэж шүүхэд ирүүлсэн билээ.

Анхааруулга

Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!