Амьтны жам ёсны эрхийг хамгаалах зөвлөмж, хугацаатай үүрэг өгснийг Байгаль Орчин, Уур Амьсгалын Өөрчлөлтийн Яамнаас мэдээллээ.
Тус яамны Төрийн нарийн бичгийн даргын 2024 оны А/34 дугаар тушаалаар байгуулагдсан ажлын хэсэг Төв аймгийн Баянчандмань сумын нэгдүгээр багийн нутаг дэвсгэрт байрлах “Талын жононгууд” ХХК-ийн эрхлэн явуулдаг амьтны хүрээлэнгийн үйл ажиллагаа нөхцөл байдалтай танилцсан байна.
Улмаар ажлын хэсгээс амьтны эрхийг хамгаалах, зэрлэг амьтад учирч болох эрсдэлийг бууруулах зорилгоор зөвлөмж, мэргэжил арга зүйн зөвлөгөө өгчээ.
Амьтны тухай хуулийн дагуу амьтныг өмчлөх эзэмших, ашиглахдаа амьтны жам ёсны эрхийг хүндэтгэн энэрэнгүй ёсоор хандаж арчилж тордох, ачиж тээвэрлэхдээ эрүүл ахуй, аюулгүй шаардлагыг хангасан арга технологи, багаж хэрэгсэл, байр сав, тохиромжтой цаг хугацаа зориулалтын тоноглосон тээврийн хэрэгсэл ашиглах, мэргэшсэн хүмүүс ажиллуулах үүргийг тус амьтны хүрээлэнгийн үйл ажиллагаа эрхлэгчид хүлээдэг.
Эх сурвалж: Байгаль орчин, уур амьсгалын өөрчлөлтийн яам
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!