УИХ-ын чуулганы танхимын улаан модон сандал, ширээг БНАЛАУ-ын Үндэсний ассамблей бэлэглэж байжээ
УИХ-ын ээлжит бус чуулганы хуралдаанд хүндэт зочин оролцлоо.
Бүгд Найрамдах Ардчилсан Лаос Ард Улсын дэд ерөнхийлөгч, хатагтай Пани Ятоду тэргүүтэй төлөөлөгчид чуулганы танхимд зочилсныг УИХ-ын дарга танилцуулав.
Манай улс БНАЛАУ-тай эртний түүхэн харилцаатай. Тэр дундаа Монгол Улсын Их Хурал болон БНАЛАУ-ын Үндэсний ассамблей хооронд өнгөрсөн хугацаанд харилцаа хамтын ажиллагаа идэвхтэй хөгжиж иржээ.
Тус улсын Үндэсний ассамблейгаас 2003 онд манай улсын парламентад хоёр улсын найрамдалт хамтын ажиллагааны бэлгэ тэмдэг болгон улаан модоор хийсэн сандал, ширээ зэрэг тавилгыг бэлэглэж байж. Эдгээр тавилгыг Монгол Улсын Их Хурлын чуулганы хуралдааны танхимд өнөөг хүртэл ашиглаж байна.
Үүнээс гадна парламентын гишүүний тоог 126 болгон нэмэгдүүлсэнтэй холбоотойгоор чуулганы танхимд сандал, ширээ нэмэх шаардлага гарсан. Энэ үед БНАЛАУ-д хандсанаар улаан модон сандал, ширээ 50 ширхэг болон бусад тавилгын тусламж үзүүлсэнд талархаж байна гэдгээ УИХ-ын дарга Д.Амарбаясгалан илэрхийлэв.
Харин Монгол Улсын Их Хурлын зүгээс 2023 оны арваннэгдүгээр сард БНАЛАУ-ын Үндэсний ассамблейн ордонд зориулан дэвсгэр, хивс бэлэглэж байжээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
