Ж.Дэлгэржаргал: Ирэх онд нийт 2,100 километр авто зам барих төслүүд эхэлнэ
2025 оны улсын төсвийн зардлыг Дотоодын Нийт Бүтээгдэхүүний 37.6 хувьтай тэнцэхээр тооцон боловсруулснаа Сангийн Яам өнөөдөр танилцууллаа.
Үүний 10.3 их наяд нь хөрөнгө оруулалтын зардал юм.
Сангийн Яам(СЯ)-ны Хөгжлийн санхүүжилт, хөрөнгө оруулалтын газрын дарга Ж.Дэлгэржаргал "Улсын төсвөөр санхүүжих 4.3 их наяд төгрөгт өмнөх онд эхэлсэн төслүүдийн санхүүжилт багтаж байгаа. Гэрээний үүргийн хүрээнд бүтэн тусгах ёстой.
Харин шинээр эхлүүлэх төслүүдийг гурван эх үүсвэрийг уялдуулах мөн "Бүсчилсэн хөгжлийн үзэл баримтлал", Засгийн газрын үйл ажиллагааны хөтөлбөрт батлагдсан учир эдгээрийг хэрэгжүүлэх зорилгоор бүсийн томоохон дэд бүтэц рүү чиглүүлсэн. Гадаад зээл, тусламжийн хувьд гэрээ хийгдсэн төслүүдийн ашиглалт тал нь явж байгаа.
Үлдэж буй 3.4 их наяд төгрөгийн санхүүжилтийг нийслэлийн бонд, орон нутгийн төсвийн хөрөнгө оруулалт. Нийслэл, орон нутаг өөрсдийнхөө асуудлыг шийддэг байхаар эх үүсвэрийг зохицуулж байна.
Томоохон төслүүд гэхээр зам, эрчим хүч, дэд бүтцийн асуудал яригдах юм. Ирэх жил нийтдээ 2,100 километр урт авто зам барих төсөл эхэлнэ. Тухайлбал Хавирга, Ульхан боомтын зам барих төсөл үргэлжлэх бол шинээр Шивээхүрэн, Бичигт, Арцсуурийн боомтын замыг барина. Мөн аймгуудыг хооронд нь авто замаар холбох, хөдөлгөөний эрчим өндөртэй аялал жуулчлалын эрэлттэй замуудыг шинээр төлөвлөлөө.
Эрчим хүчний төслийн хувьд гадаад зээл, тусламж дээр Эрдэнэбүрэнгийн Усан Цахилгаан Станц эхэлнэ. Түүнчлэн Налайх, Хөшигийн хөндийд шинэ хот байгуулахтай холбоотой эрчим хүчний асуудлыг шийднэ.
Бидний үзэж буйгаар хөрөнгө оруулалт дээр сүүлийн 10-20 жилд хийгдээгүй бодлогын томоохон өөрчлөлт хийгдсэн. Өмнөх жилүүдийн хөрөнгө оруулалтуудыг харвал улсын төсвөөр халуун усны газар, цэцэрлэг барьдаг, орон нутаг нь ч бас барьдаг байв. Харин ирэх жил улсын төсвөөр том асуудлыг шийдвэрлэхийг зорино. Орон нутаг жижиг асуудлаа шийднэ гэсэн үг" хэмээв.
Өмнө нь Сангийн Яамнаас 2025 оны улсын төсөвт нэг ч сургууль, цэцэрлэг шинээр барихгүй гэж мэдэгдсэнийг олон нийт шүүмжилж байв. Тэгвэл энэ асуудлыг тус яамнаас тодруулахад 2025 оны төсөвт өмнөх оноос шилжсэн 90 сургууль, 62 цэцэрлэгийн төслийг үргэлжлүүлэн санхүүжүүлнэ гэх тайлбарыг өгч байна. Баригдаж буй сургууль, цэцэрлэг дууссанаар 2026 онд хамгийн эрэлттэй цэгүүд дээрээ сургууль, цэцэрлэг шинээр барихаар төлөвлөжээ.
Сангийн Яам(СЯ)-ны Хөгжлийн санхүүжилт, хөрөнгө оруулалтын газрын дарга Ж.Дэлгэржаргал "Боловсрол, эрүүл мэнд, эрчим хүч, зам, дэд бүтэц гэсэн энэ таван салбарт улсын төсвийн хөрөнгө оруулалтын 60-70 хувь нь ордог. Эрчим хүчний салбар улсын төсвийн хөрөнгө оруулалтын 8 хувийг эзэлж байгаа ч гадаад зээл, тусламжаар эрчим хүчний 18 төсөл хэрэгжиж байна. Энэ хоёр эх үүсвэрийг нийлүүлэхэд эрчим хүчний салбарт хөрөнгө оруулалт авч буй хэмжээгээрээ хоёрдугаарт орно. Нэгдүгээрт зам, гуравдугаарт боловсрол байна" гэлээ.
Ташрамд дурдахад 2025 онд улсын төсвийн хөрөнгө оруулалтаар нийт 757 төсөл, арга хэмжээг хэрэгжүүлнэ. Үүний
- улсын төсвийн хөрөнгө оруулалтын 640 төсөл байгаагийн 38 нь шинэ
- гадаад зээл, тусламжаар хэрэгжих 117 төсөл байгаагийн 25 нь шинэ юм байна.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
