Х.Нямбаатар: Энэ удаа хэдүүлээ наадмаараа наадсан шиг наадъя

Гэрэл зургийг MPA агентлагийн онцгой зөвшөөрөлтэйгөөр ашиглав

Тулгар төрийн 2233 жил, Их Монгол Улсын 818 жил, Үндэсний эрх чөлөө, тусгаар тогтнолоо сэргээн мандуулсны 113, Ардын хувьсгалын 103 жилийн ой, Үндэсний их баяр наадмыг тэмдэглэх бэлтгэл ажлын талаар хотын дарга Х.Нямбаатарын өгсөн мэдээллийг багцлан хүргэж байна. Тэрбээр Үндэсний баяр наадмыг зохион байгуулах комиссын орлогч дарга юм.

• Төв цэнгэлдэх хүрээлэнгийн баруун хойд тал буюу зочид орж ирдэг хэсэгт "Улсын баяр наадам" гэсэн баннер байршуулж буй. Үүний өмнө иргэд зургаа авхуулах боломжтой.
   
• Уг дэлгэцийн хажууд цомцог гэрт арт галерей буюу 21 Дарь-Эхийг байрлуулж, олон нийтэд анх удаа үзүүлнэ.
   
• Хуушуурын асруудын зүүн хойд хэсэгт Монголын уран зургийн сор болсон бүтээлүүдээр үзэсгэлэн гаргана. Энэ жилийн наадмын үндсэн агуулга нь Монголын өв соёл, уран бүтээлчдийн сор болсон бүтээлүүдээр оюунаа баясгах юм.
   
• Төв цэнгэлдэхийг тойроод улсын цирк болон мэргэжлийн урлагийн байгууллагуудын тоглолтыг зохион байгуулна.
   
• Баруун урд буланд хүнсний Food truck-ууд байрлуулж байгаа.
   
• Төв цэнгэлдэх хүрээлэнгийн зүлэг ногоон дэвжээг шинэчилсэн.
   
• Төв цэнгэлдэх хүрээлэнг тойрсон ариун цэврийн байгууламж байхгүй болсон. Үндсэн бүх хаалга дотор ариун цэврийн байгууламжийг шинээр хийж дуусаж байна гээд "Энэ удаа хэдүүлээ наадмаараа наадсан шиг наадъя" гэв.

Сэтгүүлчийн асуултад "Төв цэнгэлдэхэд ариун цэврийн байгууламж хийгээд дуусчихсан, очоод үз миний дүү. 

Одоо Хүй долоон худаг чиглэлийн замыг хучих гээд борооны байдлаас шалтгаалаад байж байна. Бороогүй гурван өдөр байвал морины бариа хүртэлх бүх замыг хучна.

Төв цэнгэлдэх хүрээлэн болон Хүй долоон худагтай холбоотой наадмын бэлтгэл ажил хуваарийн дагуу явагдаж байна" хэмээн хариулсан юм.