Гэрэл зургийг MPA агентлагийн онцгой зөвшөөрөлтэйгөөр ашиглав

Үер, усны цаг үеийн нөхцөл байдлын урьдчилан сэргийлэх мэдээллийг Цаг Уур, Орчны Шинжилгээний Газар (ЦУОШГ)-аас хүргэлээ. 

Энэ талаар ЦУОШГ-ын Урьдчилан мэдээлэх хэлтсийн дарга Л.Оюунжаргал дараах мэдээллийг өгсөн юм. 

Тэрбээр "Зургаа, долдугаар сард төвийн аймгуудын нутгийн хойд, зүүн аймгуудын нутгийн хойд хэсгээр олон жилийн дунджаас ахиу хур тунадас орохоор байгааг өмнө нь танилцуулж байсан. 

Тодруулбал Хэнтий нурууны бүс нутгаар олон жилийн дунджаас ахиу хур тунадастай байх урьдчилсан төлөв гарсан.

Мөн наймдугаар сард төв, зүүн аймгуудын нутгаар олон жилийн дунджаас ахиу хур тунадастай байна гэж ойлгож болно.

Баруун, говийн аймгуудын ихэнх нутаг нэлээд хуурай, гандуу зуншлага тааруу, дунд үнэлгээтэй байгаа. Гэтэл энэ сарын 17-ноос баруун аймгуудын нутгаас эхлээд хур бороо орно. 

Хөрс нь хатсан, гандсан хуурайшилттай баруун аймгийн нутгаар бороо эрчимтэй орвол хөрсөндөө шингэж чадахгүйгээр үер буух эрсдэлтэй" хэмээн анхааруулав. 

Үргэлжлүүлэн ойрын өдрүүдэд хур тунадас орох бүс нутгуудыг танилцуулав. 

Зургаадугаар сард орох хур тунадас: 

• 14, 15-ны өдрүүдэд төв, зүүн аймгуудын нутгаар түр зуурын маягтай,
• 16-наас баруун аймгуудын нутгийн баруун болон хойд хэсгээр,
• 17-нд баруун аймгуудын ихэнх нутгаар, төвийн аймгуудын нутгийн баруун хэсгээр,
• 18-нд баруун аймгуудын нутгийн зарим газар, төвийн аймгуудын ихэнх нутаг, говийн аймгуудын нутгийн хойд, зүүн аймгуудын нутгийн баруун хэсгээр,
• 19-нд баруун болон төвийн аймгуудын ихэнх нутаг, говь болон зүүн аймгуудын нутгийн зарим газраар,
• 20-нд нутгийн хойд хэсгээр,
• 21-нд нутгийн баруун хагаст,
• 22-нд баруун болон төвийн аймгуудын нутгийн ихэнх, говийн аймгуудын нутгийн зарим газраар,
• 23-нд төв, говь, зүүн аймгуудын ихэнх нутгаар дуу цахилгаантай, аадар бороо орох төлөвтэй байна.

Нөөлөг салхины үзэгдэл:

• 20-нд баруун болон говийн аймгуудын нутгаар,
• 21-нд зарим газраар,
• 22, 23-нд говь, тал хээрийн нутгаар секундэд 13-15 метр, зарим үед 24 метр секунд хүрч сэрүүснэ.

Мөн "Агаарын температур энэ амралтын өдрүүдэд ихэнх нутгаар харьцангуй дулаан. Энэ үеэр Монгол Алтай, Хангай, Хөвсгөл, Хэнтийн уулархаг нутаг, Эг, Үүр, Туул, Тэрэлж голын хөндийгөөр 5-10 градус, өдөртөө 20-25 градус хүрнэ.

Говийн бүс нутгаар шөнөдөө 17-22, өдөртөө 31-36 градус дулаан байна. Бусад нутгаар шөнөдөө 11-16, өдөртөө 15-30 градусын дулаантай байхаар байгаа.

Гол мөрний мэдээний тухайд Сэлбэ, Санзай, Дамбадаржаа орчимдоо үерийн түвшнийг 5-10 сантиметр даван үерлэсэн байна" гэлээ.