Уншиж байна ...

О.Оюунчимэг: Хоёрдугаар сарын 26-ны шөнө төвийн, 27-нд зүүн аймгуудын нутгаар цасан шуурга шуурна

Б.Даваабазар, iKon.mn
2024 оны 2 сарын 23
IKON.MN
Зураг зураг
Гэрэл зургийг MPA агентлагийн онцгой зөвшөөрөлтэйгөөр ашиглав

Байгаль орчин аялал жуулчлалын яамнаас цаг үеийн асуудлаар өнөөдөр мэдээлэл хийлээ.

"Өнөө өглөөний байдлаар Монгол орны нийт нутгийн 80 гаруй хувьд цастай байна.

Өөрөөр хэлбэл Алтай, Хангай, Хэнтэй, Хөвсгөлийн уулархаг нутаг, Хан Хөхий, Хантайшир, Монголын Дорнод тал болон говийн нутгийн зарим хэсгээр 10-51 см, бусад нутагт 1-9 см, хунгарлаж шуурсан газартаа 60 см, гуу жалгандаа 100 см хүртэл зузаан цастай болсон" гэдгийг мэдээллийн эхэнд Ус цаг уур, орчны шинжилгээний газрын ахлах мэргэжилтэн О.Оюунчимэг хэллээ. 

Үргэлжлүүлэн "Зудын эрсдэлийн үнэлгээгээр:

  • Таван аймгийн 22 суманд төмөр буюу шилэн зудын,
  • 18 аймгийн 90 суманд цагаан зудын,
  • 18 аймгийн 84 суманд цагаанаар зудархуу нөхцөл байдалтай байна. 

2023-2024 оны хүйтний улирлын хувьд одоогийн байдлаар 9.6 мм буюу олон жилийн дунджаас 1.6 дахин их хур тунадас орсон. 2009-2010 оны зудтай жилийн өвлийн улиралд нийт нутгийн дунджаар 8.5 мм орсон нь олон жилийн дунджаас 1.4 дахин их орсон байсан юм.

Энэ жилийн өвөл 2009-2010 оны зудтай өвлөөс илүү цастай, 1975 оноос хойш ажиглагдаж байгаагүй их цастай өвөл болж байна.

Мөн мөс хэврэгших үзэгдэл ажиглагдаж байгаа тул зам хожиж, зам товчлох зэргээр мөсөн дээгүүр явах болон авто тээвэр хийхгүй байхыг онцгойлон анхааруулж байна.

2024 оны хоёрдугаар сарын 24-28-ныг хүртэлх цаг агаарын урьдчилсан төлөв:

  • 25-нд баруун аймгуудын нутгийн баруун болон хойд хэсэг
  • 26-нд баруун болон төвийн аймгуудын нутгийн зарим газар, зүүн аймгуудын нутгийн баруун хэсгээр
  • 27-нд баруун аймгуудын нутгийн баруун хэсэг, төвийн аймгуудын нутгийн зарим газар, говийн аймгуудын нутгийн зүүн хэсэг, зүүн аймгуудын ихэнх нутгаар цас орж, цасан шуурга шуурна.

Өөрөөр хэлбэл энэ сарын 26-ны шөнө төвийн аймгууд, 27-ны өдөр зүүн аймгуудын нутгаар цасан шуурга шуурна. Салхи ихэнх хугацаанд секундэд 5-10 метр, 25-нд Алтайн уулархаг нутгаар, 26-нд нутгийн зарим газраар, 27-нд нутгийн зүүн хагаст секундэд 13-15 метр хүрч ширүүснэ" хэмээн хэлэв. 

Гуравдугаар сарын цаг агаарын нөхцөл байдал 

Сарын дундаж агаарын темперар олон жилийн дунджаар Баян–Өлгийн баруун өмнөд, Увсын хойд, Завханы зүүн, Баянхонгорын хойд, Хөвсгөлийн баруун хойд, Архангайн баруун, Төвийн зүүн хойд хэсгээр -14...-18°С, Ховдын хойд болон өмнөд, Говь-Алтай, Дундговийн ихэнх, Баянхонгор, Өвөрхангайн өмнөд, Өмнөговь, Дорноговийн нутгаар 0...-6°С, бусад нутгаар -6...14°С хүйтэн байдаг байна.

2024 оны гуравдугаар сарын агаарын дундаж температур:

  • Баян-Өлгий, Ховд, Говь-Алтайн нутаг, Баянхонгорын өмнөд, Өмнөговийн баруун хэсгээр олон жилийн дунджаас дулаан,
  • Сэлэнгэ, Төв, Хэнтий, Дорнод, Сүхбаатарын нутаг, Булганы зүүн хэсгээр олон жилийн дунджаас хүйтэн,
  • бусад нутгаар олон жилийн дундаж орчим байх төлөвтэй. 

Сарын нийлбэр хур тунадас олон жилийн дунджаар баруун болон говийн аймгуудын ихэнх нутгаар 0–1 мм, бусад нутгаар 2–4 мм цас ордог. Тэгвэл гуравдугаар сарын нийлбэр хур тунадас Баян-Өлгий, Ховд, Говь-Алтайн нутаг, Баянхонгорын өмнөд, Увс, Өмнөговийн баруун хэсгээр олон жилийн дунджаас бага, бусад нутгаар олон жилийн дундаж орчим байх төлөвтэй байгааг Ус цаг уур, орчны шинжилгээний газраас мэдээллээ.