Apple компани энэ сарын 30-ны өдөр “Аймшигтай Хурдан” бүтээгдэхүүнээ танилцуулна

Apple компани аравдугаар сарын 30-ны өдөр болох “Scary Fast” арга хэмжээнийхээ урилгыг өчигдөр хэвлэлийнхэнд тараажээ.

Сүнсний баярын өмнөх өдөр зохион байгуулагдах арга хэмжээний нэрийг “Аймшигтай Хурдан” гэж нэрлэснээс, бас урилга дээрх логог харвал тус компани Mac ангиллын бүтээгдэхүүнийхээ хурдтай шинэ загваруудыг танилцуулах бололтой.

Тухайлбал шинэ M3 чиптэй үйлдвэрлэгдэх Mac компьютеруудыг танилцуулж магадгүй юм. Одоогоор тус компанийн энэ ангиллын бүтээгдэхүүнүүд 2022 оны зургаадугаар сард анх зарласан M2 чиптэй үйлдвэрлэгдэж байгаа.

Сар гаруй хугацааны өмнө Apple компани iPhone 15 ухаалаг гар утасны шинэ загвараа танилцуулсан билээ.

Тус компани шинэ бүтээгдэхүүн танилцуулах арга хэмжээгээ Улаанбаатарын цагаар шөнийн 01:00 цагт эхлүүлдэг уламжлалтай. Харин энэ удаа өглөөний 08:00 цагт эхлэх тов зарлажээ.

Эх сурвалж: Business Insider