Монгол Улсад үйл ажиллагаа явуулж байгаа 61 их, дээд сургуулийн ЭРЭМБЭ

Гэрэл зургийг MPA агентлагийн онцгой зөвшөөрөлтэйгөөр ашиглав

БШУЯ-наас их, дээд сургуулийн урьдчилсан эрэмбэ, чансааг өнөөдөр зарлалаа.

БШУ-ны сайд Л.Энх-Амгалан "Намайг ажил авахад Монгол Улс 100 их, дээд сургуультай байсан. Өнгөрсөн хугацаанд 27 их, дээд сургуулийн үйл ажиллагааг зогсоосон байгаа. 4,000 орчим хөтөлбөртэй байсан их, дээд сургуулиуд багшгүй, лабораторигүй, сургалтын орчингүй, орон сууцны подвальд их сургууль байсныг мартаагүй байх. 1,286 хөтөлбөрийг цуцалсан.

Сургалтын гүйцэтгэлийн үзүүлэлтийг 60-аас дээш хувиар хангаж буй 18-хан их, дээд сургууль байгаа бол 50%-аар хангаж буй 30 орчим сургууль байна. Өнөөдөр эрэмбэ зарлагдаж буй 61 их, дээд сургуулийн 50-аас дээш хувь нь сургалтын чанарт хүрч чадахгүй байна.

Их сургууль боловсролын өндөр чанарын шаардлагыг хангах ёстой. 2025 оноос дээд сургууль гэж байхгүй, зөвхөн их сургууль, коллеж байх юм.

Их, дээд сургууль төгсөж байгаа гурван хүүхдийн нэг нь ажлын байртай, хоёр нь ажлын байргүй. Монгол Улсад идэвхтэйгээр ажил хайж буй 20,000 залуусын гуравны нэг нь дээд боловсролын дипломтой хэрнээ ажилд орж чадахгүй байна. Ажил олгогч нарын хүсэж байгаа ур чадварыг дээд боловсролын байгууллага хангаж чадахгүй байна гэсэн дүгнэлтүүд гарсан.

Ойрын 5-8 жилд 38,000 инженер техникийн ажилтнуудыг бэлтгэх хэрэгцээ шаардлага бий ч сайн мэргэжилтэн бэлтгэх их, дээд сургууль цөөн байна. Хүүхдүүд гадаадад сурахыг хүсэж байгаа нь боловсролын чанартай холбоотой. Монголын их, дээд сургуулийг төгссөн хүүхдийн диплом олон улсад хүлээн зөвшөөрөгддөг тогтолцоог бий болгохын тулд эрэмбийг зарлаж байна.

61 их, дээд сургуулийг эрэмбэлэхдээ сургалтын чанар, бизнес судалгаанууд нь олон улсын нэр хүндтэй сэтгүүлүүдэд хэвлэгдсэн, оюутнуудын сургалтын орчин, дотуур байр, лабораториудыг бүрдүүлж чадсан эсэх, төгсөгчдийн хэдэн хувь нь ажлын байртай болсон, ажлын байр дээр ур чадвартай байгаа эсэхийг үндэслэсэн.

1. МУИС
2. АШУҮИС
3. ШУТИС
4. МУБИС
5. ХААИС
6. Монгол, Германы хамтарсан ашигт малтмалын технологийн их сургууль
7. СЭЗИС
8. Отгонтэнгэр ИС
9. Эм зүйн шинжлэх ухааны их сургууль /Моносын сургууль/
10. СУИС эдгээр сургууль эхний аравт урьдчилсан байдлаар эрэмбэлэгдлээ.

Үндэсний их сургуулийн эрэмбэ чансааг зарласантай холбогдуулан цаашид ахисан түвшний сургалтыг шинэ шатанд гаргах зайлшгүй шаардлага бий. Судалгааны их сургуулийг байгуулахад магистрант, докторантурын сургалт чухал. Эхний гуравт эрэмбэлэгдсэн буюу МУИС, АШУҮИС, ШУТИС-ийн 20 докторантын судалгааны сургалтыг төрөөс 100% санхүүжүүлж, цалинтай докторын хөтөлбөрийг албан ёсоор зарлаж байгааг хэлэхэд таатай байна" гэв.

Тус жагсаалтыг МУИС тэргүүлсэн бол Чингис хаан дээд сургууль сүүл мушгижээ.

Сургалтын чанараараа МУИС хамгийн өндөр буюу 94%-тай бол АШУҮИС 86%-аар удаалж байна.

Гадаад харилцаа хамгийн сайтай нь АШУҮИС, Сити их сургууль, Их засаг олон улсын их сургууль, Эм Ай Ю дээд сургууль, Олон улсын Улаанбаатарын их сургууль.

АШУҮИС, ШУТИС, МУБИС, ХААИС, ДХИС, Эм Зүйн Шинжлэх Ухааны Их Сургууль орчин үйлчилгээ үзүүлэлтээр өндөр хувьтай байна.

Дэлгэрэнгүйг ЭНД дарж үзнэ үү.