Монгол, Энэтхэг улсын хамтарсан "Нүүдэлчин Заан-2023" цэргийн сургуулилалт зохион байгуулагдаж байна

Эх сурвалж: Монгол Улсын Батлан Хамгаалах Яам

Энэтхэг, Монгол Улсын цэргийн хамтарсан туршлага солилцох "Нүүдэлчин заан" дадлага сургуулилалт энэ сарын 17-31-ны өдрүүдэд болж буй. 

Уг сургуулилалтад манай улсын 70 орчим цэрэг, Жамму, Кашмирын 43 явган цэргийн бие бүрэлдэхүүн оролцож байна.

Хоёр улсын цэргүүд тэсвэр хатуужлын бэлтгэл, рефлекс буудлага, жижиг багийн тактик, хадны дасгал сургуулилалт, бие биеийнхээ цэргийн ажиллагааны туршлагыг дээшлүүлэх зэргээр сургалтын үйл ажиллагаа үргэлжилж байгаа юм. 

Энэ жилийн сургуулилалт уулархаг газар дахь терроризмын эсрэг үйл ажиллагаанд чиглэгдэж байгаагаараа онцлогтой аж. 

Өдгөө 15 дахь удаагаа зохион байгуулж буй уг сургуулилалтын хүрээнд энэтхэгт үйлдвэрлэсэн түргэн тусламжийн хоёр автомашин, өндөр уулын тусгай зориулалтын өвлийн 200 ширхэг хувцсыг манай улсын Батлан хамгаалах яаманд гардуулан өглөө.