Дональд Трамп АНУ-ын хоёр хөрш улсыг импортын өндөр татвараар сүрдүүлэв

Трамп, Трюдо нар

АНУ-ын ерөнхийлөгчийн сонгуульд ялсан Дональд Трамп тангараг өргөснийхөө дараа Канад, Мексик хоёр улсаас импортлогддог бүх бараа бүтээгдэхүүнд 25 хувийн татвар оноохоо мэдэгдсэн юм.

Даваа гарагийн орой сошиал хуудсандаа тэр “Мексик, Канад улсуудаас АНУ руу орж ирж буй бүх бараа бүтээгдэхүүнд 25 хувийн татвар ногдуулахаар төлөвлөж байна. Мансууруулах бодис, ялангуяа фентанил, мөн хууль бус дүрвэгсдийн урсгалыг зогсоох хүртэл энэ татвар хүчинтэй байх болно. Мексик, Канадын аль алинд нь энэхүү ужгирсан асуудлыг хялбархан шийдэх боломж байгаа” гэж бичжээ.

Трамп бас АНУ-ын гол өрсөлдөгч Хятад улсын бараа бүтээгдэхүүнд оноосон байгаа бүх татвар дээр дахиад 10 хувийг нэмэхээ энэ үеэр амласан байна.

Тэрбээр ийм аргаар АНУ-ын аж үйлдвэрийн салбарыг сэргээж, ажлын байрыг нэмэгдүүлнэ гэж тооцоолж байгаа. Гэхдээ зарим мэргэжилтнүүд ийм бодлого Америкчуудын амьжиргааны зардлыг өсгөх эрсдэлтэйг анхааруулдаг.

Өчигдөр болсон хэвлэлийн хурлын үеэр Мексикийн ерөнхийлөгч Клаудиа Шэйнбаум хоёр улсын өмнө тулгараад буй нэгдмэл сорилт бэрхшээлийг хэрхэн хамтран шийдвэрлэх талаар АНУ-ын шинэ ерөнхийлөгчид захидал бичих гэж байгаагаа мэдэгджээ.

“Нэг нь нөгөөдөө оноосон татвар бидний хамтын бизнесийг эрсдэлд оруулна” гэж хэлсэн Шэйнбаум ингэвэл хоёр улсад хоёуланд нь ажилгүйдэл нэмэгдэж, инфляц өсөх аюултайг анхааруулсан байна.

 

Мексикийн ерөнхийлөгч Клаудиа Шэйнбаум

Өчигдөр бас Канадын ерөнхий сайд Жастин Трюдо мэдэгдлийнх нь дараа Трамптай утсаар ярьснаа сэтгүүлчдэд мэдээлжээ.

“Бид хамтран шийдвэрлэх боломжтой зарим сорилтуудын талаар ярилцлаа. Яриа тун үр дүнтэй болсон. Бид тодорхой асуудлуудыг хамтран шийдвэрлэх ёстой гэдгээ ойлгодог. Үүнийгээ ч хийх болно” гэж Трюдо хэлсэн байна.

Трампыг үүрэгт ажилдаа орохоос өмнө учирч болзошгүй эрсдэлүүдээс сэргийлэх арга хэмжээ авахыг Канадын сөрөг хүчнийхэн Трюдогоос шаардаж байгаа.

Тухайлбал Трампын шинэ засаг захиргаа хууль бус цагаачдыг албадан гаргаж эхэлбэл Канадыг чиглэсэн цагаачдын урсгал эрс нэмэгдэх аюултай байгаа.

Даваа гарагийн орой Трампын мэдэгдлийн дараа Канадын сөрөг хүчний улс төрч, Онтарио мужийн захирагч Даг Форд “Манай хоёр улсын хилийн асуудалд холбооны засгийн газар нухацтай анхаарах хэрэгтэй байна” гэж сошиал хуудсаараа мэдэгджээ.

Канадын газрын тос олборлогч муж Альбертагийн захирагч Даниэл Смит бас Трампын мэдэгдэлд санаа зовж байгаагаа илэрхийлсэн байна.

Тэр мөн ижил сөрөг хүчний консерватив намын гишүүн юм.

“АНУ-ын газрын тос, байгалийн хийн хамгийн том экспортлогчийн хувьд бид АНУ болон Канадын эрчим хүчний аюулгүй байдлыг бэхжүүлэх асуудлаар шинэ засаг захиргаатай хамтран ажиллахыг хүсэж байна” гэж тэр бичжээ.

Гэхдээ зарим ажиглагчид Трампын сүрдүүлгийг бодитой хэрэгжих магадлал бага, хөршүүдээ яриа хэлэлцээний ширээний ард суулгах зорилготой дарамт шахалт байж болзошгүй гэж үзэж байна.

Эх сурвалж: Aljazeera