“УБТЗ” ХНН: ДЦС-уудын нүүрсний нөөцийг нэмэгдүүлэхэд онцгой анхаарч ажиллаж байна

Өвлийн хүйтний эрч чангарч байгаа энэ үед нийслэлийн ДЦС-уудын нүүрсний тээвэрлэлтийг хэрхэн зохион байгуулж байгаа талаар УБТЗ-ын “Улаанбаатар” өртөөний дарга Б.Удамбуянаас асууж тодрууллаа.

Тэрбээр “УБТЗ-ын “Улаанбаатар” өртөө нийслэлийн 1,600 мянган хүнийг цахилгаан дулаанаар хангахад чухал үүргийг гүйцэтгэдэг. Тус өртөө нь хоног тутам дунджаар 300-350 вагон буюу 15,000-25.000 тонн нүүрсийг Багануур, Шивээ овоогийн уурхайгаас тээвэрлэж 3 болон 4 дүгээр дулааны цахилгаан станцууд/ДЦС/-ад нийлүүлдэг. Зөвхөн өнөөдөр л гэхэд 267 вагоныг бэлдэж Багануур, Шивээ овоогийн нүүрсний ачилтад явуулаад байна.

Өвлийн ид ачааллын үед ДЦС-уудын найдвартай ажиллагааг хангахад УБТЗ-ын зүгээс онцгой анхаарч энэ оны 11 дүгээр сарын 5-наас ирэх оны 3 дугаар сарын 1-нийг хүртэл эрчим хүчний нүүрсний тээврийг хатуу цагийн хуваарийн дагуу зохион байгуулж байна.

Ийнхүү нүүрсний тээвэрлэлтийг УБТЗ тасралтгүй найдвартай зохион байгуулсны үр дүнд ДЦС-3, ДЦС-4 18-24 хоногийн нүүрсний нөөцтэй болоод байна” гэж хариуллаа.

Тодруулахад “Улаанбаатар” өртөөнөөс гадна УБТЗ-ын бусад өртөөд Дархан, Эрдэнэт зэрэг томоохон хотуудын нүүрсний тээвэрлэлтийг хариуцан зохион байгуулдаг аж. 

Эх сурвалж: “УБТЗ” ХНН