ФОТО: Болор цомын эзнээр яруу найрагч А.Лхагва тодров

Гэрэл зургийг MPA агентлагийн онцгой зөвшөөрөлтэйгөөр ашиглав

Эгшиглэнт эхийн хишигт найрагч тодруулах "Болор цом 42" наадам өчигдөр зохион байгуулагдлаа.

Наадмын тэргүүн байрт яруу найрагч А.Лхагва шалгарч, Болор цомын эзэн болов.

Шагналаа гардан авсныхаа дараа тэрбээр "Монголчууд бол тэнгэр газрыг алдалж өссөн, тэнүүн уудамд торнисон ард түмэн. Монголын нүүдэлчдийн соёл, малчин ухаан цаглашгүй. Нүүдэлчдийн соёл, малчдын их оюун сэтгэл, монгол яруу найраг дэлхий даяар түгэн дэлгэрэх болтугай" хэмээн сэтгэгдлээ хуваалцсан юм.

Энэ жилийн яруу найргийн наадамд 201 хүн бүртгүүлж, 198 хүн шүлгээ ирүүлснээс хоёрдугаар шатанд 28 найрагч хоёрдугаар шатанд шалгараад байв.

“Болор цом-42” яруу найргийн наадмын тэргүүн шүлэг:

"Морин хуурын хэл”

Сэтгэлээс үүссэн салхинд
Хээрийн салхи хөлчүүрнэ
Тэнгэрээс үүдсэн аялгуунд
Уулсын сэтгэл халууцна
Морин хуурын эгшиглэн
Ийм эртний хэл
Монгол газар үүссэн
Эх сайхан хэл
Энэ хэлийг анирдсан хүн
Эрэмшин омогшино
Энэ хэлийг сонордсон хүн
Элэг нь дэвтэж уярна
Тэнгэрийг
Тэр өндрийг
Туг гэрэгээрээ өргөж
Туйлсан их суу залиар
Сүлд хийморьтой болгосныг
Тэнгэрийн үгээр хүүрнэнэ
Талыг Талбиун уудмыг
Тэнгис далайг цалгиаж
Тивийг сэрээсэн нүүдлээр
Тэнүүн уудам болгосныг
Талын хэлээр шуранхайлна
Морин хуурын хэл
Монгол тэнгэрийн хэл
Монгол газрын хэл ээ.
Унаж сөхөрсөн үед
Уруудаж бүдэрсэн цагт
Морин хуурын үүрсээн
Монгол хүнийг сэрээсэн
Морьтой гэдгийг нь сануулсан
Халирч зэлэрсэн үед
Хавтайж бөхийсөн цагт
Морин хуурын төвөргөөн
Монгол хүнийг сэхээсэн
Мордоод давхихыг харуулсан
Сүлд хийморийг сэрээж
Сүгнийтэл тэнгэрийн дээр гаргаж
Элэр аялгуу нь наранд хүргэж
Эртний өвгөдтэй уулзуулж
Хөөрөг зөрүүлэн хуучлуулж
Хөх толбыг минь тодруулж өгдөг
Морин хуурын хэл
Монгол хүмүүний хэл ээ
Бадран омогшихын бал
Бахархан гэрэлтэхийн гал
Морьтон монголын хөл
Монголыг асаасан хэл
Энэ хэлээр биднийг
Эх дэлхий танина
Энэ хэлээрээ бид
Элэн галавтай ч ярилцана
Морин хуурын хэлээрээ
Монгол язгуурын хэлээрээ
Дээд сансрыг ч уяраана
Дэлхийг дахин дагуулна аа

ФОТО: