Х.Булгантуяа: Төрийн байгууллагуудын харьяа амралт, сувиллын газрууд хүүхдийн зуслангийн үйлчилгээ үзүүлнэ
Олон улсын хүүхдийн эрхийг хамгаалах өдөр буюу Хүүхдийн баяр маргааш болно.
Энэхүү өдрийг тохиолдуулан Засгийн газрын хуралдаанаар зарим шийдвэрийг гаргасан тухай Хөдөлмөр, нийгмийн хамгааллын сайд Х.Булгантуяа танилцуулав.
Тэрбээр
- Төрийн байгууллагын харьяанд амралт, сувилал олон байдаг. Гэвч хүүхдүүд нь зун амрах газар олдохгүй байхад төрийн байгууллагууд амралт сувилалтай байх нь зохимжгүй юм гэж үзээд эдгээр амралтыг Найрамдал зуслангийн удирдлага, зохион байгуулалтад оруулж, хүүхдийн зуслангийн үйлчилгээ үзүүлэхээр шийдвэрлэлээ. Хөдөлмөр, Нийгмийн Хамгааллын Яамнаас ажлын хэсэг гарч ажиллана.
- Төрийн өмчид байсан хүүхдийн зуслангуудыг 2002-2009 онд хувьчилсан. Эдгээр хувьчилсан зусланд шалгалт хийж, шаардлагатай бол төр өөрөө эсвэл төрийн бус байгууллагуудаар ажиллуулах нь зүйтэй гэж үзлээ.
- Гэр бүл, хүүхэд, залуучуудын хөгжлийн агентлагийг зөвхөн хүүхдэд чиглэсэн үйл ажиллагаа явуулдаг Хүүхэд, гэр бүлийн агентлаг болгох нь зөв гэж шийдвэрлэсэн" гэлээ.
Мөн тэрбээр хүүхдийн мөнгөн тэтгэмжтэй холбоотойгоор "Хүүхдийн мөнгөнөөс хасагдсан байсан есөн хувьд нөхөн олгоно. Хүсэлтээ хэрхэн бүртгүүлэх талаар иргэдээс асууж байгаа. Ойрын хугацаанд холбогдох журам гаргана. Аль болох цахимаар, энгийн, чирэгдэл багатайгаар зохион байгуулна.
Иргэд хүсвэл хүүхдийн мөнгөнөөс татгалзаж болох бөгөөд энэ тохиолдолд Хүүхдийн төлөө фонд руу орно" гэлээ.
ВИДЕО:
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
