ТООЦООЛОЛ: Төрийн албан хаагчдын цалинг ингэж нэмнэ

Гэрэл зургийг MPA агентлагийн онцгой зөвшөөрөлтэйгөөр ашиглав

Улсын 2023 оны төсвийг 1.8 их наяд төгрөгөөр тодотгох төслийг Засгийн газраас боловсруулжээ.

Үүний тал хувь нь төрийн албан хаагчдын цалингийн нэмэгдэлд зориулагдана гэдгийг Хөдөлмөр, нийгмийн хамгааллын сайд Х.Булгантуяа өнөөдөр мэдээлэв. Тэрбээр Засгийн газрын шийдвэрийг танилцуулах хэвлэлийн хурлын үеэр цалингийн нэмэгдлийн талаар дараах мэдээллийг өгөв.

Энэ удаад төрийн өндөр албан тушаалтнуудын цалинг нэмэхгүй, харин иргэдэд хүрч ажилладаг хүмүүсийнхийг нэмнэ хэмээн тэрбээр хэлсэн юм. 

Сайд Х.Булгантуяа "Төрийн 217.7 мянган албан хаагчийн цалинг нэмнэ. Тодруулбал,

• Боловсрол, эрүүл мэнд, соёл, шинжлэх ухаан, спортын салбарын үндсэн цалингийн доод хэмжээг нэг сая төгрөг болгоно. Үүн дээр ажилласан жил, үр дүн, гүйцэтгэл, орон нутгийн зэрэг нэмэгдэл нь тооцогдоно.
• Төрийн нийтлэг үйлчилгээний 52 мянган албан хаагчийн суурь цалин 565 мянган төгрөг байгааг долдугаар сарын 1-нээс 750 мянган төгрөг болгож, нэмэгдүүлнэ. 
• Нийслэл, орон нутаг, яам зэрэг төрийн захиргааны албан хаагчдын цалингийн ялгааг арилгаж, суурь цалингийн доод хэмжээ 718 мянган төгрөг байгааг нэг сая төгрөг болгоно. 
• Төрийн тусгай албан хаагчдын цалинг нэг ангилалтай болгож, үндсэн цалингийн доод хэмжээг нэг сая төгрөг болно.
• Баг, хороодын Засаг дарга нарын цалин 697 мянган төгрөг байгаа тул үүнийг нэмнэ" хэмээн танилцуулав.

Дээр дурдсан албан хаагчдын цалингийн нэмэгдэлд 986.6 тэрбум төгрөгийг зориулахаар  улсын төсвийн тодотголын төсөлд тусгаад байна.

Өөрөөр хэлбэл,

• төрийн нийтлэг үйлчилгээний 58.9 мянга,
• соёл урлаг, биеийн тамир, спортын 2.6 мянга,
• төрийн захиргааны 23 мянга,
• төрийн тусгай 35 мянга,
• төрийн мэргэжлийн үйлчилгээний 93.2 мянга,
• төрийн нийтлэг үйлчилгээний 58.9 мянга,
• төрийн улс төрийн 3.8 мянган төрийн албан хаагчийн цалин 10-50 хувиар нэмэгдэхээр болж байна.