Л.Дашдэмбэрэл: Цаашид гарт олгох мөнгөн тэтгэмжээс илүү халамжийн үйлчилгээ болгож олгох нь зүйтэй

Гэрэл зургийг MPA.mn

Монгол Улсын хэмжээнд буюу сум, хороо болон 2,000 хүнээс дээш хүн амтай баг тосгонд нийт 570 гаруй Амьжиргаа дэмжих зөвлөл ажиллаж байна.

 Нэг амьжиргааг дэмжих зөвлөл нь долоон гишүүний бүрэлдэхүүнтэй бөгөөд хараат бус, бие даасан шийдвэр гаргах зорилгоор ажиллаж байна хэмээн Хөдөлмөр, халамж үйлчилгээний ерөнхий газрын дарга Л.Дашдэмбэрэл Амьжиргааг дэмжих зөвлөл(АДЗ)-ийн хамтын ажиллагааны уялдаа холбоо сэдэвт хэлэлцүүлгийн үеэр хэллээ.

Уг хэлэлцүүлэг нь иргэнийг нийгмийн халамжийн үйл ажиллагаанд хамруулах эсэх шийдвэрийг гаргах явцад гарч буй хүндрэл бэрхшээлийг хэлэлцэх зорилготой аж.

Мөн тэрбээр "Амьжиргаа дэмжих зөвлөлийн бүрэлдэхүүнд нийгмийн ажилтан, төрийн болон  төрийн бус байгууллагын төлөөлөл, иргэдийн төлөөлөл гэх мэт хүмүүс багтдаг. Нийгмийн халамжийн тухай хуульд заасан 19 нэр төрлийн үйлчилгээ, олон хүүхэдтэй эцэг эхчүүдэд олгох хуультай холбоотой болон ахмад настны хуультай холбоотой шийдвэрийг АДЗ-ийн хэмжээнд үзүүлдэг. Энэ хүрээнд анхаарах асуудлыг цаашид шинэчлэх талаарх зохицуулалтуудыг ярьж байна.

Нэг талаас АДЗ хараат бус ажиллаж байна гэх хардалт гардаг тул нийгэмд илүү нээлттэй ил тод болгох талаас ямар арга хэмжээ авч ажиллуулах уу, хуульд өөрчлөлт оруулах уу. Нөгөө талаас халамжийн үйлчилгээг цахимжуулсан. Тодруулбал 72 нэр төрлийн үйлчилгээнээс боломжтой гэж үзсэн 64 нэр төрлийн үйлчилгээг ehalamj.mn системд нэвтрүүлсэн.

Халамжийн үйлчилгээ үзүүлж буй хэлбэрээр харвал 90 гаруй хувь нь мөнгөн тэтгэмжид, 10 хувь нь үйлчилгээнд суурилсан байна. Цаашид гарт олгох мөнгөн тэтгэмжээс илүү халамжийн үйлчилгээ болгож олгох нь зүйтэй” гэв.

Авлигатай тэмцэх үндэсний хөтөлбөр 2023 онд шинээр батлагдана 

АТГ-ын Урьдчилан сэргийлэх, соён гэгээрүүлэх хэлтсийн дарга, эрхэлсэн комиссар Х.Ихмөрөн "2016 онд УИХ-ын 51 дүгээр тогтоолоор Авлигатай тэмцэх үндэсний хөтөлбөр батлагдсан. Ингэхдээ төрийн байгууллагын үйл ажиллагааг сайжруулах, төр хувийн хэвшил иргэний нийгмийн байгууллагуудтай хамтарч ажиллах, төрийн  үйлчилгээг чанаржуулах, авлигын эсрэг тодорхой арга хэмжээ авах зэрэг зорилтууд тусгагдсан.

Энэхүү зорилтын хүрээнд Авлигатай тэмцэх үндэсний хөтөлбөр хоёр үе шаттай явагдаад энэ жил дуусаж байна. 2023 оноос шинэ үндэсний хөтөлбөрөө батлуулна. Мөн Авлигын эсрэг өдөр арванхоёрдугаар сарын 9-ний өдөр тохионо. Үүнийг угтан найман салбарт цуврал хэлэлцүүлгийг зохион байгуулж байгаа. Өнөөдөр зургаа дахь хэлэлцүүлэг нь болж байна.

АТГ-ын Урьдчилан сэргийлэх, соён гэгээрүүлэх хэлтсээс хүнд суртлыг багасгая, нийтийн албанд мөрдөгдөж буй хууль тогтоом мөрдөгдөж буй эсэх, захиргааны актууд хэрхэн мөрдөгдөж байгааг анхааран ажиллаж байна. АТГ-ын зүгээс хууль тогтоомжийг мөрдүүлэх чиглэлээр тухайн салбартай хамтарч ажилладаг” гэв.

Нийгмийн халамжийн тухай хуулийн шинэчилсэн найруулгын төслийг намрын чуулганд өргөн мэдүүлэхээр ажиллаж буй аж. Төслийн үзэл баримтлалын тухайд гэвэл,

1. Зорилтот бүлэгт чиглүүлнэ.
2. Бэлэн мөнгөний бус үйлчилгээг нэмнэ
3. Хөдөлмөр эрхлэлттэй холбоно
4. Халамжийн тогтолцоог сайжруулна
5. Орон нутгийн үүрэг, оролцоог нэмэгдүүлнэ гэдгийг ХНХЯ-ны Бодлого төлөвлөлтийн газрын ахлах шинжээч Д.Гэрэлтуяа хэлэлцүүлгийн үеэр онцолсон юм.