Гэрэл зургийг Mpa.mn

NoDoubleStandard хөдөлгөөнийхөн тэгш эрхийг шаардан, үзэл бодлоо илэрхийлж буй.

Тус хөдөлгөөнийг зохион байгуулагчдын нэг, иргэн Д.Монголхүүг баривчилсныг иргэд хууль бус гэж үзэн, Хууль зүй, дотоод хэргийн яамны гадаа эсэргүүцлээ илэрхийлэв.

Тэд өчигдөр буюу аравдугаар сарын 5-ны өдрийн 16:00 цагаас эхлэн одоог хүртэл хууль бусаар баривчлагдсан Д.Монголхүү тэргүүтэй иргэдийг суллахыг шаардаж байгаа юм.

"Монголчуудын үгээ хэлж, үзэл бодлоо илэрхийлэх эрх чөлөөнд халдаж байна"

Иргэдийн төлөөлөл “Бид хууль бусаар баривчилж, хорьсон таван залууг суллах, мөн ажлаа хийж чадахгүй байгаа Хууль зүй, дотоод хэргийн сайдыг огцрох шаардлага тавин энд эсэргүүцлээ илэрхийлж байна.

Урьд шөнө энд 20 орчим залуу эсэргүүцлээ илэрхийлсээр хоносон. Бид тайван замаар эсэргүүцлээ илэрхийлээд энд сууж байтал өнөөдөр өглөө цагдаа нар дахин баривчилгаа явууллаа.

Тэд гурван эмэгтэй, нэг эрэгтэйг ямар ч үндэслэлгүйгээр үзэл бодлоо илэрхийлснийх нь төлөө, нэмж баривчлаад аваад явлаа.

Монгол бол ардчилсан улс. Цагдаа нар ямар хуулийн хүрээнд ийм үйл ажиллагаа явуулж байгаагаа мэдэхгүй, зүгээр л тушаал аваад иргэдээ ингэж барьж байна. Ингэж болохгүй. Монголчуудын үгээ хэлж, үзэл бодлоо илэрхийлэх эрх чөлөөнд хууль бусаар халдаж байна” хэмээн ярив.

"Энэ үйл явдал нь нийгэм маш аюултай, ноцтой байдал руу явж байгааг харуулж байна"

 

Гэрэл зургийг Mpa.mn

Мөн өчигдрийн жагсаалын үеэр Ардчилсан намын дарга М.Тулгат “Үзэл бодлоо илэрхийлж, Төв талбайд тайван замаар эсэргүүцлээ илэрхийлсэн залуусыг цагдаа нар хөөж, баривчилж эхэлсэн. Тухайн залуусын эсэргүүцэл үзүүлэх болсон шалтгаан нь төр, засгаас гаргасан шийдвэр тэгш үйлчлэхгүй байгаатай холбоотой.

Өөрөөр хэлбэл, цар тахлын үед бүх ААН, жижиг дунд бизнес эрхлэгчдийн үйл ажиллагааг хязгаарлачхаад наадам хийх, олон хүн цуглуулсан арга хэмжээ зохион байгуулсны улмаас энэ тэмцэл эхэлсэн. Гэвч тэднийг төрөл бүрийн арга заль хэрэглэж, хамгийн сүүлд цагдаагийн биед гэмтэл учруулсан гэж хэрэг үүсгэн, баривчилгаа хийж байгаа үйл явдлыг эсэргүүцэж байна.

Дарангуй төртэй бусад улс орнуудад иргэдийн үзэл бодлоо илэрхийлэх үйлдлийг дардаг ийм жишээ бий. Өнөөдрийн энэ үйл явдал нь нийгэм маш аюултай, ноцтой байдал руу явж байгааг харуулж байна.

Энэ бол дан ганцхан иргэн Д.Монголхүүгийн асуудал биш. Эсэргүүцлээ илэрхийлсэн өөр хүмүүсийг бас барьсан байсан.

Зүгээр л үзэл бодлоо илэрхийлсэн залуусыг зориудаар ийнхүү барьж, хэрэг үүсгэж буй гутамшигт байдлыг таслан зогсоох хэрэгтэй” хэмээн ярьсан юм.

Харин Цагдаагийн байгууллагаас Д.Монголхүүг баривчлах болсон шалтгаанаа Төв талбайд бүртгэлгүй жагсаал зохион байгуулж, цагдаагийн байгууллагын хууль ёсны шаардлагыг биелүүлээгүйтэй холбоотой гэж тайлбарлав.

"Цаашид хууль ёсны шаардлагыг эсэргүүцэж, олон нийтийг турхирдаг үйл ажиллагааг шалгаж, арга хэмжээг авах болно"

 

Энэ тухай ЦЕГ-ын Мөрдөн байцаах албаны дарга Б.Батсуурь “Монгол Улсын Үндсэн хуульд заасны дагуу иргэд үзэл бодлоо чөлөөтэй илэрхийлж, жагсаал цуглаан зохион байгуулах эрхтэй. Цагдаагийн байгууллага үүнд хүндэтгэлтэй хандаж, иргэдийн эрх чөлөөг хамгаалсаар ажиллаж ирсэн.

Иргэн Д.Монголхүүгийн хувьд, есдүгээр сарын 30-ны өдөр Д.Сүхбаатарын талбайд бүртгэлгүй жагсаал, цуглаан зохион байгуулсан. Бүртгэлгүй жагсаалыг зохион байгуулсантай холбоотой мэдэгдэл шаардлагыг хүргүүлсэн ч хүлээн аваагүй бөгөөд хууль сахиулагчийн үйл ажиллагааг эсэргүүцсэн.

Эдгээрийг үндэслэж Сүхбаатар дүүргийн прокурорын газар нотлох баримтыг хүргүүлсэн тул Эрүүгийн хуулийн тусгай ангийн 23 дугаар зүйлийн 1-д заасны дагуу хэрэг бүртгэлийн хэрэг нээж, мөрдөн шалгах ажиллагаа явуулсан.

Энэ ажиллагааны явцад иргэн Д.Монголхүү нь мэдэгдэл хуудас хүлээж авахгүй, ирэхгүй байх хүндрэл гаргасан тул СБД-ийн шүүхээс захирамж гаргаж, цагдаагийн байгууллага хойшлуулшгүй үйл ажиллагаа явуулж, 48 цагийн хугацаатай баривчлах арга хэмжээ авсан.

Цаашид Цагдаагийн байгууллагаас хууль ёсны тавьсан шаардлагыг эсэргүүцэж, түүнийгээ олон нийтэд турхирдаг үйл ажиллагааг шалгаж, хууль тогтоомжийн дагуу холбогдох арга хэмжээ авч ажиллах болно” гэжээ.

Гэрэл зургийг Mpa.mn /2021.10.06/