Онгоцонд анх удаа ихэр хүүхэд мэндэлсэн тохиолдол болсон гэв
Истанбул-Улаанбаатар чиглэлийн тусгай үүргийн нислэгээр эх орондоо ирэх замдаа жирэмсэн эх амаржиж, онгоцонд ихэр охин төрүүлсэн билээ.
Эх, хүүхдүүдийн бие сайн байгаа бөгөөд тэдний тусгаарлалтын хугацаа дууссанаар өнөөдөр ХӨСҮТ-өөс гарч байна.
Онгоцонд мэндэлсэн охидод МИАТ ТӨХК-аас тус компанийн онгоцоор үнэ төлбөргүй нисэх эрх өгч байгаа юм.
Шууд үзэх:
"ОХУ-ын Сочи хотын дээгүүр явж байхад анхны охин мэндэлсэн"
Тус нислэгийн Багш нисгэгч Г.Мөнх-Очир "Монголд онгоцонд хүүхэд төрсөн анхны тохиолдол нь 1960-аад онд тохиосон. Энэ үед АН-24 агаарын хөлөгт хүүхэд мэндэлсэн байдаг.
Ихэр охид мэндэлсэн нь онгоцонд хүүхэд төрсөн хоёр дахь тохиолдол болж байгаа.
Долдугаар сарын 9-нд Истанбулаас дүүрэн зорчигчтой хөөрч, өндрөө авч дууссаны дараа ахлах үйлчлэгч н.Алтанхуяг, н.Цэрэнханд нар ирж, жирэмсэн эх өвдөж эхэлснийг хэлсэн.
Буцаад буухад бидний буултын жин хүнд, буулаа гэхэд олон цаг хүлээх байсан учраас нислэгийг үргэлжлүүлэх шийдвэрийг нисэх баг гаргасан. Үүнээс цаг гаруйгийн дараа ОХУ-ын Сочи хотын дээгүүр өнгөрч байхад анхны охин мэндэлсэн, арваад минутын дараа удаах охин мэндэлсэн.
Агаарын хөлөгт хоёр эх баригч, эмч гээд олон хүн явж байж таарч, бүгд их тусалсан. Тэд байгаагүй бол тун эрсдэлтэй байлаа.
Энэ ташрамд, агаарын хөлөгт хамт зорчиж, бидэнд гүн туслалцаа үзүүлж, хоёр нярайг маань эрүүл энх төрөхөд нь эх барьж авсан эмч нартаа гүн талархлаа илэрхийлье" гэлээ.
"Ихэр охид болон ээжийг нь МИАТ ТӨХК-ийн нислэгийн бүх чиглэлд насан туршдаа үнэгүй нисэх эрхийн бичгийг олгож байна"
МИАТ ТӨХК-ийн захирал Д.Баттөр "Монгол Улсад дотоодын нислэгт өмнө нь хүүхэд төрж байсан. Олон улсын нислэгт анх удаа хүүхэд төрж байгаа тохиолдол юм. Мөн ихэр хүүхэд онгоцонд мэндэлж буй нь дэлхийд анхных болж байгаа.
Долдугаар сарын 9-н нь МИАТ ТӨХК үүсгэн байгуулагдсаны яг дараагийн өдөр тохиосон юм. Биднийг их түгшээж бас баярлуулсан. Монголчууд бид охид төрвөл өсөн дэвжих нь хэмээн ихэд бэлгэшээдэг. Бид ч их бэлгэшээж байна.
Тиймээс манай компаниас охидод болон ээжийг нь МИАТ ТӨХК-ийн нислэг үйлддэг бүх чиглэлд насан туршдаа үнэ төлбөргүй нисэх эрхийн бичгийг олгож байна" гэлээ.
Харин охидыг аль улсын харьяалалд бүртгэх гэх асуултад тэрбээр хариулахдаа "Агаарын хөлгийн дотор тал нь Монгол Улсын нутаг дэвсгэрт хамаарна. Харин хаана төрсөн бэ гэвэл онгоцонд гэх байх. Энэ бол тун ховор тохиолдол. Эх баригч, сэхээний эмч зэрэг мэргэжлийн хүмүүс онгоцонд байж таарсан. Үнэхээр ус уух хувьтай охид юм. Онгоц дүүрэн зорчигчтой байсан. Истанбулаас 260 зорчигчтой хөөрөөд, 262 хүнтэй буусан" хэмээлээ.
Охиддоо Б.Энхцэлмэг, Б.Энхжигүүр хэмээн нэр хайрлажээ
Ихэр охины ээж Д.Болортуяа "Онгоцод орохоос хоёр өдрийн өмнөөс бие жаахан чилээрхсэн. Есдүгээр сард төрөх байсан ч охид маань долоон сар хүрээд төрлөө. Анх 1.4 кг, 1.6 кг төрсөн. Төрсний дараагаар жин нь буураад, дахин нэмэгддэг юм байна. Одоогоор хэвийн жиндээ хүрч байгаа.
Бие тамирдуу байсан учраас онгоц хөөрсний дараагаар төрлөө. Охиддоо Б.Энхцэлмэг, Б.Энхжигүүр хэмээх нэр хайрласан" гэв.
Б.Батсүх: Олон хүний дэмжлэгтэйгээр эх, хүүхдүүдээ эсэн мэнд авчирсандаа баяртай байна
ХӨСҮТ-ийн Яаралтай тусламжийн тасгийн дарга Б.Батсүх "Би халдвартын эмч, анх удаа тусгай үүргийн нислэгт явсан нь долдугаар сарын 9-ний Истанбул-Улаанбаатар чиглэлийн нислэг байлаа. Онгоц хөөрснөөс 30 минутын дараа төрөхийн өмнөх өвдөлт эхэлсэн. Тухайн үедээ онгоцны үйлчлэгч хүний бие муудлаа гэж дуудахад нь очиход эхийн даралт өндөр 150/100-тай байв. Охидын ээж долоон сартай жирэмсэн, ихэр хүүхэд тээж байгаа гэдгээ хэлсэн.
Даралт бууруулах эм өгөөд байж байтал дараахан нь ус нь гарчихсан. Онгоцонд тусгай өрөө байхгүй тул хоол бэлддэг өрөөнд оруулж, хоол цай зөөдөг ширээн дээр эхийг хэвтүүлсэн. Эхийн даралт их, хавантай, дутуу тээлттэй байсан нь хэвийн нөхцөлд ч эрсдэлтэй, хүнд төрөлт шүү дээ.
Нислэгийн багт би ганцаараа эмч байсан тул зорчигчид дунд эмч хүн бий эсэхийг асуухад хүүхдийн эмч, Эх нялхсын сэхээний сувилагч, орон нутагт эмчээр ажиллаж байсан туршлагатай хүмүүс байж таарч, сайхан баг бүрдсэн.
Төрсний дараа эхийн даралт унасан, буухад гурван цаг дутуу байхад нэг нярайн зүрх зогссон тул зүрхний массаж хийж, байнгын хүчилтөрөгчтэй явж байж ирсэн. Ганц, хоёр эмчид бол хүнд байх байсан. Харин олон хүний дэмжлэгтэйгээр эх, хүүхдүүдээ эсэн мэнд авчирсандаа баяртай байна" гэлээ.
ФОТО:
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
72 СЭТГЭГДЭЛТЭЙ
|
