Тайландын парламент Ерөнхий сайддаа итгэл үзүүлэх асуудлыг хэлэлцлээ
Тайландын Үндэсний хурал буюу парламент өчигдөр Ерөнхий сайд Инглак Чинават, Дотоод хэргийн сайд Чарупонг Руангсуванд итгэл үзүүлэх асуудлыг хэлэлцлээ.
Энэ асуудлыг сөрөг хүчний Ардчилсан намаас сөхөж тавьсан бөгөөд хоёр өдрийн турш хэлэлцэх юм байна. Тэдний үзэж буйгаар Чинават, Руангсуван нар авлигын хэрэгт холбогдсон гэнэ. Гэхдээ Тайландын парламентын олонхын суудлыг Ерөнхий сайд Инглак Чинаватын Засгийн газрыг дэмжигч “Пыа тай” нам бүрдүүлдэг аж.
Тайландын өнөөгийн Засгийн газрын үйл ажиллагаа, түүнчлэн экс Ерөнхий сайд Таксин Чинаваттай холбоотой асуудлаас болж тус улсад сүүлийн хэд хоногт эсэргүүцлийн жагсаал болсон. Жагсагчид хилийн чанадад байгаа Таксин Чинаватыг улс орноо далдуур удирдаж байна гэж үзжээ.
Таксин Чинаватын хувьд 2006 оны цэргийн эргэлтээр засгийн эрхээс түлхэгдсэн унасан.
Хожим нь түүнийг эрх үүргээ хэтрүүлэн ашигласан гэж үзэж, хоёр жил хорихоор болсон ч гадаадад дүрвэжээ.
Засгийн газрын үйл ажиллагааг эсэргүүцсэн жагсагчид эмх замбараагүй байдал дэгдээсэн тул, нийслэл Бангкок болон түүнтэй залгаа гурван мужид энэ сарын 25-наас аюулгүйн өндөржүүлсэн бэлэн байдал зарлахаас өөр аргагүй болсон байна. Уг арга хэмжээ он дуустал үргэлжлэх аж.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
