Агаарын чанарын үзүүлэлтийг аравдугаар сарын сүүлээр харьцуулбал бодит үр дүнг илтгэнэ
Улаанбаатар хотын агаарын чанарын үзүүлэлтийг яг одоо буюу аравдугаар сарын 11-ний өдрийн 12.00-13.00 цагийн байдлаар харвал 100 айл орчмын агаар хамгийн цэвэр буюу 32 гэсэн үзүүлэлтийг зааж байна. Үүний дараа Бөхийн өргөө, Баруун дөрвөн зам, Толгойт орчмын агаар нийслэл дундаа хамгийн цэвэр агаартайд тооцогдож буйг харж болно.
Харин хамгийн өндөр бохирдолтой хэсэгт Ургах наран хорооллын орчим орж байна. Тус бүсэд агаарын чанарын индекс 379 байгаа нь Толгойт орчим буюу гэр хороолол хамгийн ихтэй хэсгийнхээс л гэхэд бараг найм дахин бохирдолтой гэсэн үг юм.
Ургах наран хорооллын хувьд түүхий нүүрс хэрэглэхийг хориглосон бүсэд хамаарч байгаа. Гэвч Гачууртын уулзвараас Налайх-Чойрын уулзвар хүртэлх 20.9 км авто замыг шинэчлэх ажилтай холбоотойгоор тээврийн хэрэгслүүдийг шороон замаар зорчуулж байгаагаас үүдэн ийнхүү агаарын чанарын үзүүлэлт муу байна хэмээн дүгнэж болохоор байгаа юм.
Түүхий нүүрсийг ахуйн хэрэглээний зориулалтаар нийслэл хот руу оруулахгүй байх тухай Засгийн газрын тогтоол энэ оны тавдугаар сарын 15-наас хэрэгжиж эхэлснээр Улаанбаатар хотын гэр хорооллын иргэд энэ жил анх удаа сайжруулсан шахмал түлш ашиглаж буй. Харин нийслэлийн таван хороо түүхий нүүрс түлэх боломжтой байгаа.
Улаанбаатар хотын агаарын чанар өнгөрсөн 2017 оны мөн үед ямар түвшинд байсныг доорх графикаас харах боломжтой.
График 1. 100 айл дахь араагын чанарын үзүүлэлт 2017.10.10 ба 2019.10.10
Улаанбаатар хотын агаарын бохирдол арваннэгдүгээр сараас огцом нэмэгддэг. 2017 оны тухайд л гэхэд аравдугаар сарын 18-наас агаарын чанарын үзүүлэлтүүд эрс муудсаныг доорх графикаас харж болно.
График 2. 2017 оны агаарын чанарын үзүүлэлт
Тиймээс арваннэгдүгээр сараас эхлээд сайжруулсан шахмал түлш нийслэлийн агаарын бохирдлыг үнэхээр бууруулж чадаж байгаа эсэхийг бид хэмжих боломжтой болох нь.
