Дэлхий даяар нийт 664 сая тоннын даацтай 265 хөлөг онгоц Монгол Улсын далбаан дор далайд хөвж байна

Өчигдөр CNN агентлаг далайн тээврийн хөлөг онгоцнууд эдийн засгийн шалтгаанаар өөр улсын нэр дээр бүртгүүлж үйл ажиллагаа явуулдаг тухай сэдвийг хөндсөн байна.

Саяхан Ормузын хоолойд газрын тос тээвэрлэж байсан Британийн хөлгийг Иран улс олзолсон нь үнэндээ Британийн далбаан дор ажилладаг Шведийн хөлөг байжээ. Далайн тээврийн хөлгүүд аль нэг орны нэр дээр бүртгэлээ шилжүүлэхэд маш амархан болсон байна.

Мэргэжилтнүүдийн хэлж байгаагаар зээлийн карттай хүн 15 минутын дотор хөлгийнхөө бүртгэлийг дурын улсын далбаан дор шилжүүлж чадах гэнэ.

Өнөөдөр дэлхий даяар ачаа тээвэрлэж буй нийт хөлгүүдийн 40 орчим хувь зөвхөн Панам, Либери, Маршаллын арлуудын далбаан дор бүртгэлтэй байдаг аж. Гэтэл энэ гурван улс нийлээд дөнгөж 169 хөлөгтэй гэнэ.

CNN-д ярилцлага өгсөн мэргэжилтнүүд Монгол Улсын далбаан дор хөлгөө бүртгүүлэх нь тун ашигтай байдаг тухай ярьжээ. “Далайд гарцгүй, боомтгүй, далайн тээвэргүй энэ орны далбааг авахад хямд, өндөр шалгуургүй байдаг тул хөлөг онгоцны эздэд ашигтай байдаг” гэж тэд ярьсан байна.

 

НҮБ-ын тоо баримтад өгүүлснээр одоо нийт 664 сая тонн багтаамжтай 265 хөлөг Монголын далбаатай дэлхийн өнцөг булан бүрт хөвж яваа гэнэ.

Далайн хүчирхэг гүрэн Грек л гэхэд дэлхийд томоохонд орох далайн флоттой ч ихэнх хөлөг нь өндөр татвараас зугтаж, өөр улсуудын далбаан дор хөвдөг байна.

Эх сурвалж: CNN