СТАТИСТИК: Монголд хэн хамгийн өндөр цалин авдаг вэ?
Салбараар нь авч үзвэл 2017 оны цалингийн дундаж хэмжээгээр хамгийн өндөр нь уул уурхайн салбарт ажиллагчдын дундаж цалин 2.1 сая төгрөг гэдгээр тэргүүлж байна.
2017 оны байдлаар манай улсын дундаж цалин 944.5 мянган төгрөг байсан бөгөөд 2018 оны нэгдүгээр улирлын байдлаар дундаж цалин 998.4 мянган төгрөг болж нэмэгдээд байна. Үүнээс үзвэл уул уурхайн салбарт ажиллагчдын дундаж цалин улсын дунджаас хоёр дахин их байгаа юм.
Уул уурхайн салбарын дараагаар дундаж цалин хамгийн өндөртэй нь олон улсын байгууллага, суурин төлөөлөгчийн газрууд 1.7 сая төгрөгийн дундаж цалинтайгаар жагсаж байна.
График 1, Дундаж цалин, салбараар, эх сурвалж: ҮСХ
Дундаж цалингийн үзүүлэлтээр жагсаасан нийт 21 салбараас хамгийн бага цалинтай хэсэгт хүн хөлслөн ажиллуулдаг өрхийн үйл ажиллагаа болон урлаг, үзвэр, тоглоом наадмын салбар орох ажээ.
Үндэсний Статистикийн Хорооны аж ахуйн нэгж, байгууллагын ажиллагчдын сарын дундаж цалинг байгууллагын хариуцлагын хэлбэрээр нь ялгаж харуулсан мэдээллээс харвал хамгийн өндөр цалинтай газруудад төрийн өмчит үйлдвэрийн газрууд, хувьцаат компаниуд, хязгаарлагдмал хувьцаат компаниудын дундаж цалин дунджаас дээгүүр бичигдэж байна.
График 2, Дундаж цалин, байгууллагын хариуцлагын хэлбэрээр,
БГХН - Бүх гишүүд нь хариуцлагатай нөхөрлөл
ЗГХН - Зарим гишүүд нь хариуцлагатай нөхөрлөл
Харин хариуцлагын хэлбэрээр хоршоо, орон нутгийн өмчит үйлдвэрийн газрууд дахь дундаж цалин улсын түвшнээс доогуур байгааг график 2-оос харж болно.
Дээрх графикаас харвал төрийн өмчит үйлдвэрийн газрын цалин бусад хэлбэрийн байгууллагаас харьцангуй өндөр байгаа нь анхаарал татна. Энэ нь эрдэс баялгийн салбар дахь төрийн өмчит компаниудын ажиллагчдын цалин өндөр байгаатай холбогдож байхыг үгүйсгэхгүй юм. Тухайлбал, Эрдэнэт Үйлдвэрийн захирал гэхэд сардаа 10 мянган долларын цалинтай, ТУЗ-ийн гишүүн нь гэхэд жилд 71 сая төгрөгийн цалин авч байна. 2016 онд ил болж байсан мэдээллээс үзэхэд зөвхөн эрдэс баялаг бус бусад салбарын төрийн өмчийн компанийн захирлууд ямар хэмжээний өндөр цалин авдгийг ч бид танилцуулж байсан билээ.
