Газрын маргааныг 21 хоногт шийдвэрлэх үүрэг өглөө
-Нийслэлийн газрын албаны дарга нар газрын маргааны асуудлаар хэлэлцлээ-
Өнөөдөр буюу энэ сарын 12-ны өдөр НИТХ-ын дарга С.Амарсайхан Нийслэлийн есөн дүүргийн газрын албаны дарга нар болон Иргэдийн төлөөлөгчдийн хурлын дарга нартай хамтран хэлэлцүүлэг зохион байгууллаа.
Иргэдээс ирсэн гомдолд хамгийн ихээр зонхилж байгаа нь газар өмчлөх болон эзэмшихтэй холбоотой мэдээлэл бүртгэгджээ. Мөн газрын албаны удирдлагын зохион байгуулалт, ажилчдын хүнд суртал, ёс зүйн асуудал иргэдээс ирүүлсэн санал гомдлын дийлэнх хувийг эзлээд байгаа аж. Тиймээс өнөөдрийн хэлэлцүүлгийг хийж дүүргүүдийн газрын албаны дарга нарт 21 хоногийн хугацаатай үүрэг чиглэл өгөөд байгаа юм.
Цахим газар олголт иргэдийг амыг хаах явцгүй ажил болсон
Хэлэлцүүлгийн үеэр цахим газар олголт нэрийдлээр ямар ч тооцоололгүй газрууд ихээр олгогдсон. Тодруулбал, хад асга, гуу жалга, дэд бүтцийг тооцоолохгүйгээр зөвхөн иргэдийн амыг хаасан хэлбэрээр газар олголт хийсэн. Энэ нь эргээд маш их асуудал дагуулж байна. Тэгэхээр газрын талаар нэгдсэн бодлого нийслэлээс гаргах хэрэгтэй гэдгийг газрын албаны зарим дарга нар онцолж байв.
Нийслэлийн Газрын алба албан хэрэг хөтлөлтийн Edoc, Smart city программуудаар дамжуулан цахим хэлбэрээр иргэдийн ирүүлсэн өргөдөл, гомдлыг бүртгэн авч байна. Тэгвэл энэхүү программаар дамжуулан 34,949 өргөдөл гомдол хүлээн авснаас шийдвэрлэлт 94 хувьтай байгаа аж.
2018 онд ухаалаг газрын менежментийг нэвтрүүлнэ
Түүнчлэн, газрын албанаас өнгөрсөн нэг жилийн хугацаанд иргэдэд газраа өмчлөхөд нь дэмжлэг үзүүлэх 3 сарын аяныг зохион байгуулж, газар өмчлөлийн ажлыг эрчимжүүлж, нийслэлийн бүтээн байгуулалтын 79 ажлын газрыг бүрэн чөлөөлсөн, иргэдийн эрүүл аюулгүй, тав тухтай орчныг бүрдүүлэхээр орц гарц чөлөөлөх ажлыг зохион байгууллаа.
Мөн иргэн аж ахуйн нэгжийг чирэгдүүлэхгүй байх үүднээс газар эзэмших эрхийг 15 жилээр сунгадаг болгосон, нийтийн эдэлбэр газарт газар эзэмших, ашиглах эрх олгохыг бүрэн зогсоосон, сургууль, цэцэрлэгийн хашаанд олгосон газрын эрхийг хүчингүй болгох ажлыг эхлүүллээ.
2018 онд ухаалаг газрын менежментийг нэвтрүүлэх, газрын бирж, газрын санг бий болгох, иргэдэд үзүүлэх үйлчилгээг олон улсын стандартад нийцүүлж, мэдээллийн ил тод байдлыг хангах зорилгоор цахим үйлчилгээг түлхүү нэвтрүүлэхээр зорьж байна.
