Лабораторийн тусламж, үйлчилгээний чанарыг сайжруулахаар хэлэлцэж байна

“Лабораторийн тусламж, үйлчилгээний чанарыг сайжруулах нь” зөвлөлдөх уулзалт өнөөдөр Эрүүл мэндийн яамны сургалтын танхимд эхэлж байна.  

Зөвлөлдөх уулзалтад ЭМЯ-ны Төрийн нарийн бичгийн дарга А.Эрдэнэтуяа, ЭМЯ-ны Оношилгоо, эмчилгээний технологийн хэлтсийн дарга Н.Гэрэлт-Од, Стандартчилал хэмжилзүйн газрын дарга Г.Гантөмөр болон аймаг, дүүргийн Эрүүл мэндийн газрын удирдах ажилтан, лабораторийн 110 эмч, мэргэжилтнүүд оролцож байна.

Хоёр өдөр үргэлжлэх уг уулзалтаар Эрүүл мэндийн лабораторийн тусламж, үйлчилгээг 2010-2015 онд хөгжүүлэх стратегийн хэрэгжилтийг эрчимжүүлэх, лабораторийн тусламж, үйлчилгээний тулгамдсан асуудлыг хэлэлцэж сайжруулах талаар санал боловсруулах ажээ.

Хэлэлцэх асуудлууд:

• Эрүүл мэндийн лабораторийн хүний нөөцийн өнөөгийн байдал
   
• Ажлын байрны тодорхойлолт, мэргэжлийн индексийг олон улсын жишигт ойртуулан шинэчлэх
   
• Төгсөлтийн дараах сургалтын хөтөлбөр, стандарт
   
• Монгол улс дахь эрүүл мэндийн лабораторийн магадлан итгэмжлэл
   
• Чанарын гадаад хяналт, үнэлгээний өнөөгийн байдал 
   
• Нянгийн эсрэг эмийн тэсвэржилтийн өнөөгийн байдал, цаашид хэрэгжүүлэх арга хэмжээ 
   
• Лабораторийн оношзүйн салбарын олон улсын ололт, амжилтууд болон өөрийн орны сайн туршлагыг сурталчлах зэрэг өргөн хүрээний асуудал

Зөвлөлдөх уулзалтаас “Эрүүл мэндийн лабораторийн тусламж, үйлчилгээг 2010-2015 онд хөгжүүлэх стратеги”-ийн хэрэгжилтийг эрчимжүүлэх талаар зөвлөмж гаргах юм байна.