Татварын албыг бизнесийн үйл ажиллагаанд хамгийн их хүндрэл учруулагч гэжээ

АНУ-ын Азийн сан, Сант Марал сантай хамтран “Монгол Улсад засаглал, ил тод байдлыг дэмжих” хөтөлбөрийн хүрээнд хийсэн бизнес эрхлэлтийн орчин дахь авлигын нөхцөл байдлын судалгааны үр дүнг өнөөдөр танилцууллаа.

Уг судалгааг 2012 оны арванхоёрдугаар сараас хийж эхэлсэн бөгөөд энэ нь дөрөв дэх удаагийн судалгаа ажээ.

Энэ оны дөрөвдүгээр сард хийгдсэн уг судалгаанд Улаанбаатар хотын 330 компани хамрагджээ.

Бизнес эрхлэлтийн орчин дахь авлигын нөхцөл байдлын судалгааг тогтмол явуулснаар төр хувийн хэвшлийнхний дунд авлигыг бууруулах талаар яриа, хэлэлцүүлгийг өрнүүлж улмаар сайн засаглалыг дэмжих зорилготой юм байна.

Судалгааны гол үр дүнг танилцуулъя

• Бизнесийн ерөнхий орчинд сэтгэл хангалуун оролцогчдын тоо 2012 онд 27,2 хувь байсан бол энэ оны эхний хагасын байдлаар 12,4 хувь болж буурчээ.
• Албан бус татвар хураамжийг саад бэрхшээл гэж үздэг бизнес эрхлэгчдийн тоо 2012 оныхтой харьцуулахад хоёр дахин буурчээ.
• Нийт судалгаанд оролцогчид татварыг хамгийн гол саад бэрхшээл, харин татварын албыг бизнесийн үйл ажиллагаанд хамгийн их хүндрэл учруулагч хэмээн үзжээ.
• Бизнесийн бэрхшээлтэй асуудлуудыг шийдвэрлэхэд байгууллагынхаа нөөц бололцооноос огт зарцуулдаггүй компаний тоо 2012 онд 9,7 хувь байсан бол энэ онд 18,5 болж өсчээ.
• Засгийн газрын явуулж буй авилгатай тэмцэх арга хэмжээний талаар мэдээлэлтэй оролцогчдын тоо 2013 оны 10 сарынхтай харьцуулахад хоёр дахин буурч 4,2 хувь болж, огт мэдээлэлгүй хүмүүсийн тоо бараг хоёр дахин өсч 16,4 хувь болжээ.
• Авлигын эсрэг дотоод дүрэм журам гаргасан компаний тоо 2012 онд 9,7 байснаа, энэ онд 17 хувь болж нэмэгдсэн байна.