“Coal Mongolia-2014” чуулганд найман орны 1000 гаруй төлөөлөгч оролцоно
Ирэх долоо хоногт “Coal Mongolia-2014” чуулган болно. Энэ талаар өчигдөр Уул уурхайн яам, Ашигт малтмалын газар, “Эрдэнэс МГЛ” ХХК-аас мэдээлэл хийлээ.
Зохион байгуулагчдын хэлж буйгаар нүүрсний салбарт хөрөнгө оруулагчдын дөрөв дэх удаагийнолон улсын чуулга уулзалтад найман улсын 1000 гаруй төлөөлөгч оролцохоор санал ирүүлээд байгаа ажээ.
Хэдийгээр өнгөрсөн онд дэлхийн зах зээл дээр нүүрсний үнэ унаж, Монгол Улсын хувьд ч нийлүүлэлт буурсан. Гэвч нүүрсний салбар хөрөнгө оруулагчдын сонирхлыг татсан хэвээр байна гэдгийг онцолж байлаа.
Чуулга уулзалт нүүрсний аж үйлдвэрлэлийг хөгжүүлэх стратегийн чиг хандлага, Монголын нүүрсний өрсөлдөх чадвар, төслийн санхүүжилт, нэмүү өртөг шингэсэн аж үйлдвэрлэл, эрчим хүчний нүүрс гэсэн сэдвийн хүрээн дор өрнөх юм байна.
Чуулга уулзалтын зохион байгуулах хорооны нарийн бичгийн дарга Б.Алтаншагай хэлэхдээ “Нүүрсний салбарын чуулга уулзалт нь нэгдүгээрт хөрөнгө оруулалт татах, хоёрдугаарт дэвшилтэт технологийг нэвтрүүлэх, гуравдугаарт өрсөлдөх чадварыг нэмэгдүүлэх зорилгыг өвөрлөж буй. Энэ жилийн хувьд өрсөлдөх чадварыг нэмэгдүүлэх асуудлыг нэгдүгээрт тавина” гэлээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
