“Буянт –Ухаа 1” хорооллын байр мкв нь 1,2 сая төгрөгөөр борлуулагдана

Үндэсний бүтээн байгуулалтын корпорацийн барьж буй “Буянт-Ухаа1” хорооллын эхний ээлжийн 567 айлын орон сууц ашиглалтад ороод байгаа бол хоёрдугаар ээлжний 1197 айлын орон сууц ирэх тавдугаар сард ашиглалтанд орно. 

Төрийн оролцоотой учир энэ хорооллын байрны үнэ боломжийн хямд байх болов уу гэсэн иргэдийн хүлээлт бий.

Тэгвэл өнөөдөр Ерөнхий сайд “Буянт Ухаа 1” хорооллын байр хэрхэн борлогдох болоод ямар үнэтэй зарагдах талаар мэдээлэл хийлээ.

Н.Алтанхуягийн мэдээлснээр тус хорооллын байрны метр/кв нь нэг сая хоёр зуун наян мянган төгрөгөөр борлогдох юм байна. 

Н.Алтанхуягийн мэдээлснээр тус хорооллын байрны метр/кв нь нэг сая хоёр зуун наян мянган төгрөгөөр борлогдох юм байна. 

Зах зээлийн ханшнаас доогуур зарагдах энэхүү хорооллыг гэхдээ хүссэн хүн бүхэн авах боломжгүй. 

Засгийн газрын бодлогын хүрээнд гурван төрлийн иргэдэд энэхүү байрыг тодорхой шалгуурыг үндэслэж борлуулна. 

Гурван төрлийн иргэн гэдэгт:

1. Залуу гэр бүл
2. Хөгжлийн бэрхшээлтэй иргэн
3. Тэтгэврийн насны иргэд дээрх байрнаас худалдан авах боломжтой. Ингэхдээ шууд 100 хувийн төлбөрийн нөхцөлтэй худалдан авалт хийхгүйгээр орон сууцны найман хувийн зээлд хамрагдаж байж энэ байрнаас авах боломжтой. 

“Буянт Ухаа 1” хороололд байр авах иргэдэд тавигдах ЕРӨНХИЙ ЗУРГААН шаардлага:

1. Байрыг борлуулахдаа 60 хувийг нь төрийн албан хаагчдад, 40 хувийг нь үлдсэн иргэдэд зарна. 
2. Найман хувийн зээлд хамрагдаж байр авах иргэдэд тавигдах шаардлагын нэгдүгээрт мэдээж байрны урьдчилгаа 30 хувийн төлбөрийг төлөх чадвартай байх ёстой. 
3. Энэхүү байрнаас байр худалдан авч байгаа иргэн анх удаа байр худалдан авч буй тохиолдолд байрыг борлуулна. Энэ нь өмнөх Засгийн газрын зургаан хувийн хүүтэй зээл шиг байр өмчлөх эрхээс өөр ойлголт бөгөөд зөвхөн анх удаа өөрийн нэр дээр худалдан авч байгаа гэсэн тусгай шаардлага байна. 
4. Байрыг үнэ нэмэн бусдад дамлан худалдах, түрээслэх боломжийг 15 жилээр хязгаарлана.
5. “Буянт-Ухаа 1” хорооллоос байр худалдан авах хүн өмнөх Засгийн газрын хөнгөлөлттэй нөхцөлд огт хамрагдаагүй байх ёстой. Үүнд “Төрийн албан хаагчийн 4000 орон сууц хөтөлбөр”, өмнөх болон одоогийн Засгийн газрын зарласан зургаа, найман хувийн хүүтэй орон сууцны зээлд огт хамрагдаагүй байх ёстой.
6. Тэтгэврийн болон хөгжлийн бэрхшээлтэй иргэд гэр бүлийн бусад гишүүнтэй хамтран зээлдэгч байдлаар зээлд хамрагдах боломжтой. 

Ерөнхий сайд дээрх ерөнхий шаардлагуудыг танилцууллаа. Харин яг хэзээнээс борлогдож эхлэх болоод нарийн журмыг эцэслээгүй байгаа билээ. 

“Буянт Ухаа -1” хороололд ашиглалтад орсон байр 33-67 м/кв-ийн хэмжээтэй борлуулагдах юм байна.