Тесла компани бага насны хүүхдүүдэд зориулсан $225-ын үнэтэй унадаг дугуй худалдаанд гаргав
Цахилгаан автомашин үйлдвэрлэгч Тесла компани Пүрэв гарагт нэгэн шинэ бүтээгдэхүүн худалдаанд гаргасан нь $225-ын үнэтэй, 2-5 насны хүүхдүүдэд зориулсан “Balance Bike for Kids” нэртэй унадаг дугуй байлаа.
Хөдөлгүүргүй, дөрөөгүй, зөвхөн хөлөөрөө газарт жийж явах зориулалттай энэ дугуй тус компанийн “Lifestyle” ангиллын бүтээгдэхүүн юм байна.
Хөнгөн жинтэй цагаан магнезиум хийцтэй, суудлын өндрийг таван түвшинд тохируулж болдог, хажуу талдаа “Tesla” бичигтэй, урд талдаа “T” логотой энэ дугуй 35 хүртэл килограмм жинтэй, 33 см-ээс уртгүй хөлтэй хүүхдэд зориулагдсан гэнэ.
Ижил төстэй бүтээгдэхүүнүүдтэй харьцуулахад “Balance Bike for Kids” нь нэлээд өндөр үнэтэйд тооцогдож байна.
Тесла өмнө нь хүүхдэд зориулсан цөөн тооны бүтээгдэхүүн зах зээлд гаргаж байсан.
Тухайлбал нэг удаа $1,900-ын үнэтэй Tesla Cyberquad ATV дөрвөн дугуйт гаргасан нь хүүхдийн аюулгүй байдлын стандартыг зөрчсөн үндэслэлээр буцаан татагдаж байжээ.
Гэхдээ Теслагийн фэнүүдэд шинэ бүтээгдэхүүний өндөр үнэ худалдан авахад төдийлөн саад болохгүй байгаа бололтой. Тус компанийн вэб сайтад мэдээлснээр дугуйн эхний багц тэд дороо зарагдаж дууссан тул дараагийн багцад урьдчилсан захиалга авч эхэлсэн байна.
Эх сурвалж: Engadget
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
