Японы засгийн газар цөмийн хаягдал хадгалах боломжтой арлыг судалж эхэлжээ

Японы засгийн газрын цөмийн хаягдал зайлуулах ажлыг хариуцдаг агентлаг тус улсын хамгийн зүүн захын арал болох Минамиторийг хаягдал хадгалах цэг болгон ашиглах боломжийг судалж эхэлснээ Лхагва гарагт мэдэгджээ.

Цөмийн цахилгаан станцуудаас гарах хаягдлыг хадгалах газрыг сонгох зорилготой 20 жилийн турш үргэлжлэх гурван үе шаттай судалгааны эхний шатанд Сүтцү, Камоенай, Гэнкай зэрэг газруудыг хамруулаад байгаа бөгөөд дөрөв дэх нь Минамитори арал болж байна.

Минамитори арлыг бүхэлд нь болон эрэг дагуух далайн ёроолыг судалгаанд хамруулах гэнэ.

“Бид судалгааг болгоомжтой, тогтвортой үргэлжлүүлэх болно. Бид орон даяар аль болох олон бүс нутгийг үүнд хамруулах хүсэлтэй байгаа” гэж Цөмийн Хаягдлыг Удирдах Байгууллагын ерөнхийлөгч Акира Ямагүчи мэдэгджээ.

Өмнөх гурван газраас ялгаатай нь Минамитори аралд хүн амьдардаггүй. Токио хотоос зүүн зүгт 1,900 км зайд оршдог тус арал дээр зөвхөн засгийн газрын болон өөрийгөө хамгаалах зэвсэгт хүчний төлөөлөл байрладаг.

Төслийн эхний шат хоёр жил үргэлжлэхдээ тухайн бүс нутгийн геологийн эх сурвалж дээр үндэслэн газарзүйн нөхцөл байдал, галт уулын идэвхжил зэргийг судлах юм байна.

Судалгаанд хамрагдахыг зөвшөөрсөн орон нутгийн захиргаа хоёр тэрбум иен ($12.6 сая) хүртэл хэмжээний буцалтгүй тусламж засгийн газраас авах боломжтой ажээ.

Японы эдийн засаг, худалдаа, аж үйлдвэрийн яам Минамитори арлыг судлах хүсэлтийг гуравдугаар сард гаргаж, тус арал харьяалагддаг Огасавара хотын захирагч Масааки Шибуяа дараа сард нь зөвшөөрөл өгч байв.

Гэхдээ судалгааны дараа дараагийн үе шат хэрэгжихэд Токио хотын захирагч Юрико Койкегийн зөвшөөрөл шаардлагатай болох юм байна. Тэрбээр одоохондоо энэ талаар ямар байр суурьтай байгаагаа илэрхийлээгүй байгаа юм.

Эх сурвалж: Kyodo News