Ж.Лхагвадорж: ДЦС-5 төслийн трасст 26 нэгж талбар өртсөнөөс 20-ийг чөлөөлсөн бол зургаатай нь тохиролцож байна
Дулааны тавдугаар цахилгаан станцыг барихаар нийслэлээс 3 жилийн хугацаатай, жилийн 14 хувийн хүүтэй, нэг бүр нь нэг сая төгрөгийн нэрлэсэн үнэ бүхий 200 мянган ширхэг бондыг олон нийтэд арилжиж эхлээд буй.
Уг төслийн явцын талаар нийслэлийн Нэгдсэн төслийн удирдлагын газар ОНӨТҮГ-ын Төслийн удирдлага нэвтрүүлэлтийн хэлтсийн дарга Ж.Лхагвадорж "Дулааны тавдугаар цахилгаан станц төслийн ТЭЗҮ бүрэн дууссан. Станцыг барих трасст 26 нэгж талбар өртсөнөөс 20 нь газраа чөлөөлсөн бол зургаан нэгж талбартай тохиролцож байна.
Станцыг дулааны хоёрдугаар станцын газар дээр барих юм. Ингэснээр дулааны үндсэн шугамын эх үүсвэрт холбогдоход ойрхон буюу 500 метрийн зайтай учраас тус байршлыг сонгосон.
Гүйцэтгэгчээр сонгогдсон компани нь Монгол Улсад усан болон дулааны цахилгаан станц барьсан туршлагатай юм билээ. Станцын барилга угсралтын ажлыг энэ жил эхлүүлж 2028 онд ашиглалтад оруулахаар төлөвлөсөн.
Дулааны тавдугаар цахилгаан станц нь 300 МВт цахилгаан, 340 Гкал дулааныг төвийн системд нийлүүлэх бөгөөд 51,000 янданг буулгах боломжтой юм" хэмээн танилцуулав.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
