Даатгалын компаниуд зөвхөн эрсдэлийг хамгаалаад зогсохгүй — хөрөнгийн захын хамгийн том институтийн хөрөнгө оруулагч байдаг.

Жил бүр иргэд, компаниуд даатгалын компаниудад даатгалын хураамж төлснөөр эрсдэлийн сан бүрддэг. Энэ санг даатгалын компаниуд хөрөнгийн захад эргэлтэд оруулснаар эдийн засгийн өсөлтийн эх үүсвэр болдог.

Үндэсний эрсдэлийн сангийн үүрэг гүйцэтгэдэг даатгалын компаниуд олон бэрхшээл, саадыг давж нийт мөнгөн хөрөнгө нь 2025 оны байдлаар 415 тэрбум төгрөгт хүрсэн нь даатгалын салбар мэргэжлийн хөрөнгө оруулагч болж буйг харуулж байна. Энэ хөрөнгийг компанийн хувьцаа, бонд, үнэт цаас болон дэд бүтцийн төсөлд оруулснаар хөрөнгийн зах зээлийг хөгжүүлж, улс орны санхүүжилтийн эх үүсвэрийг бэхжүүлэх боломжтой болж байна.

 

Өнөөдөр Даатгалын 5 компани хөрөнгийн зах зээлд хувьцаагаа гаргаж нээлттэй компани болсноор нийт 28,000 гаруй хувьцаа эзэмшигчтэй болсон нь чамлахааргүй үзүүлэлт юм. Мөн даатгалын салбар улс даяар нийт 1.4 сая харилцагчдыг эрсдэлээс хамгаалж хүлээсэн үүрэг хариуцлагаа биелүүлж ажиллаж байна.

 

Олон улсын жишээ: Даатгал хэрхэн эдийн засгийг тэтгэдэг вэ?

Дэлхийн тэргүүлэгч орнуудад даатгалын салбар нь зөвхөн эрсдэлийг хамгаалаад зогсохгүй, эдийн засгийн хөгжлийн гол санхүүжүүлэгч болдог.

АНУ-д 8 их наяд гаруй долларын хөрөнгийг Blackrock, Vanguard зэрэг сангаар дамжуулан зах зээлд оруулдаг бол Японд Nippon Life, Dai-ichi Life зэрэг компаниуд метро, эрчим хүч, ухаалаг хот зэрэг дэд бүтцийн томоохон төслүүдийг санхүүжүүлдэг.

Германы Allianz 1.1 их наяд гаруй еврогийн хөрөнгөөрөө Европын санхүүгийн тогтвортой байдлыг бэхжүүлдэг. Өмнөд Солонгос 1980-аад онд даатгалын хуримтлалаар Samsung, Hyundai зэрэг аварга корпорацуудын өсөлтийг дэмжин "Хангангийн гайхамшиг"-ийг бүтээсэн бол Сингапур даатгалын хөрөнгийг ухаалаг хот, эрүүл мэнд, боловсролын дэд бүтцэд оруулан төсвийн дарамтыг бууруулж байна.

Даатгалын салбарын хөрөнгө бол зүгээр л хадгалагдаж буй мөнгө биш — энэ нь ирээдүйн нийслэл, ирээдүйн үйлдвэр, ирээдүйн ажлын байрыг санхүүжүүлдэг үндэсний хөгжлийн хөрс юм.

Олон улсын туршлага үүнийг тодорхой харуулж байна.