Гавьяат тамирчин Ө.Дүүрэнбаяр Гүржийн үндэсний бөхөөр дэлхийн дэд аварга боллоо

Гүрж улсын үндэсний бөх болох Чидаоба бөхийн 2025 оны Дэлхийн Аварга Шалгаруулах Тэмцээн (ДАШТ)-д Монгол Улсын гавьяат тамирчин Ө.Дүүрэнбаяр анх удаа оролцож, мөнгөн медаль хүртсэн талаар Монголын Жүдо Бөхийн Холбоо (МЖБХ)-ны нарийн бичгийн дарга Б.Батгэрэл өөрийн цахим хуудсандаа мэдээлжээ.

Өдгөө 31 настай Ө.Дүүрэнбаяр нь жүдогийн ДАШТ-ээс хүрэл медаль хүртсэн нэгэн. 

Тэрбээр энэ тэмцээнд

• 1-р тойрогт Италийн бөхийг цэвэр ялсан,

• 2-р тойрогт Туркменистаны бөхийг цэвэр ялсан,

• 3-р тойрогт Латвийн бөхийг 2 онооны илт давуугаар ялсан,

• 4-р тойрогт АНУ-ын бөхийг 4 оноогоор ялсан,

• 5-р тойрогт нутаг нэгт ОУХМ Х.Цогтгэрэлийг 1 оноогоор ялсан,

• 6-р тойрог буюу зооны аваргын төлөө Узбекстаны бөхийг нэмэлт цагт 2 оноо авч ялснаар финалд шалгарсан юм.

Алтан медалийн төлөөх барилдаанд тэрбээр нутгийн хүчтэн, Гүржийн бөхтэй тун өрсөлдөөнтэй барилдаж 1 онооны зөрүүтэйгээр ялагдан, дэлхийн дэд аварга болжээ.

 

Гүржийн үндэсний бөхийг чидаоба гэдэг. Энэ бөхийн төрөл нь өнөөгийн чөлөөт бөх, самбо бөхийн хөгжилд гол нөлөө үзүүлсэн спорт ч гэж үздэг юм.

Бөхчүүд нь тусгай бүс, өмдтэй барилддаг бөгөөд 2018 онд ЮНЕСКО-гийн соёлын өвд бүртгүүлжээ. 

Дүрмийн хувьд нэгнээ унагаах болон тэнцвэр алдуулах зорилготой. Харин өчих, боох зэрэг мэх хийхийг хориглодог аж.