Э.Цэндбаатар WBC холбооны аваргын бүс горилогчдын нэг болов

Э.Тэмүүлэн, iKon.mn
0 минутын өмнө
IKON.MN
Зураг зураг

Мэргэжлийн боксын дөрвөн том холбооны нэг World Boxing Council (WBO) тавдугаар сарын шинэ чансаагаа танилцууллаа.

Шинэчлэгдсэн чансаагаар Монгол Улсын Гавьяат тамирчин Э.Цэндбаатар superfeatherweight буюу 58.967 кг жингийнхээ 15-д эрэмбэлэгдэв. Ингэснээр манай тамирчин албан ёсоор аваргын бүс горилогч болж байна. Саяхан тус холбооны АНУ-ын мөнгөн бүсийн эзэн болсон Э.Цэндбаатар бүсээ хамгаалах дараагийн тулаанаа 120 хоногийн дотор хийх даалгавартай гэдгээ өөрийн цахим хуудсаараа мэдэгдсэн билээ.

Одоогоор түүний жинд WBC холбооны бүсийг АНУ-ын О'Шакуи Фостер эзэмшиж байна. Тэгвэл чансааны нэгт Италийн Майкл Магнеси бичигдэж байгаа бол түүний араас АНУ-ын Рэймонд Форд, Их Британийн Райан Гарнер, тус холбооны мөнгөн бүсийн эзэн Францын Халил Эль Хадри, Марокко гаралтай Испанийн боксчин Моусса Голам нар эхний тавд жагсав.

Чансааны топ 10-т монголчуудын сайн танил Гари Рассел, Мексикийн Эдуардо Нунес, Тажикистаны Мухаммадхужа Якубов, Японы Ямато Хата, Бразилын Робсон Конкейчао нар оржээ. Нэгэн цагт дэлхийн аваргын бүс эзэмшиж явсан Гари Рассел аварга цолоо алдсанаас хойш хэсэг завсарлаад өнгөрсөн оны долдугаар сард Хуго Кастанадаг ялсан билээ. Тэрбээр Монгол Улсын Гавьяат тамирчин Н.Төгсцогтыг ялж байсан юм.

Сонирхуулахад WBC холбооны бүс эзэмшигчид болон чансааны 15-д жагсаж байгаа тамирчид "Clean Boxing Program"-д заавал бүртгүүлдэг аж.  

Тус холбооны шинэчлэгдсэн чансааг та эндээс харах боломжтой.