Ослын урьдчилсан дүгнэлт гарсны дараа Энэтхэгийн эрх баригчид Boeing онгоцны түлшний товчийг шалгах үүрэг өглөө

Өнгөрсөн сард Air India компанийн Boeing загварын онгоц Энэтхэгийн нэг нисэх буудлаас Лондон хотын чиглэлд хөөрмөгцөө осолдсоны улмаас 260 орчим хүн амиа алдсан билээ.

Бямба гарагт ослын шалгалтын урьдчилсан дүгнэлт гарсан юм.

Ослын өмнөхөн онгоцны хөдөлгүүрт чиглэсэн түлшний урсгалыг зохицуулдаг товчны байрлал “ажиллах” төлөвөөс “унтраах” төлөвт шилжсэн байсан нь шалгалтын явцад тодорхой болжээ.

Нэг нисгэгч товчийг “яагаад унтраасныг асуухад” нөгөө нисгэгч нь ингээгүйгээ хариулсныг бүхээгийн ярианы бичлэг харуулсан байна.

Гэхдээ урьдчилсан дүгнэлтэд энэ үйлдлийг онгоцны осолд шууд нөлөөлсөн гэж үзээгүй байв.

 

Хэдий тийм боловч Энэтхэгийн иргэний нислэгийн удирдах байгууллага өчигдөр бүх агаарын тээврийн компаниуддаа дээрх товчны түгжээг шалгах үүрэг өгчээ.

Үүнээс өмнө АНУ-ын Холбооны Нислэгийн Захиргаа дээрх товчны төлөвийг өөрчлөх үйлдэл аюулгүй болохыг мэдэгдсэн юм.

Гэхдээ 2018 онд тус байгууллагаас гаргасан гарын авлагад Boeing загварын бүх онгоцнуудын түлшний хяналтын товчийг санамсаргүй дарагдахаас хамгаалж, түгжихийг агаарын тээврийн компаниудад зөвлөсөн байдаг юм байна.

Энэтхэгийн эрх баригчид дээрх зөвлөмжийн дагуу арга хэмжээ авч байгаа ажээ.

Air India компанийн хувьд энэ зөвлөмжийг заавал хэрэгжүүлэх шаардлагагүй гэж үздэг байсан гэнэ.

Өчигдөр бас Өмнөд Солонгосын эрх баригчид Boeing онгоцоор нислэг үйлддэг агаарын тээврийн компаниуддаа түлшний хяналтын товчтой хэрхэн харьцах талаар заавар өгөхөөр бэлдэж байгааг эх сурвалжууд мэдээлсэн байна.

Эх сурвалж: BBC