Өнөөдөр Хэнтий, Сүхбаатар, Дорноговийн нутгаар аадар бороо орно. Гол мөрнүүдийн усны түвшин 5-30 см-ээр нэмэгдсэн байна
Өнөөдөр Хэнтий, Сүхбаатар, Дорноговийн нутгаар дуу цахилгаантай усархаг аадар бороо орох талаар Цаг уур, орчны шинжилгээний газраас мэдээллээ.
Иймд тухайн хугацаанд орсон хур борооны эрчимжил хэмжээнээс шалтгаалан гол мөрний усны түвшин богино хугацаанд огцом нэмэгдэх, хуурай сайр гуу жалгаар уруйн үер буух нөхцөл бүрдэх тул иргэд үерийн аюултай бүсээс хол, аюулгүй газар зусах, амрах болон гол мөрөн, нуурын ойролцоо амарч зугаалахдаа ажиглалт хийж, уулын ам, голын ай сав, үерийн буулт бүхий газарт отоглож , хоноглохгүй байх, зөвхөн зөвшөөрөгдсөн зам гүүрээр зорчихыг зөвлөв.
Өнгөрсөн хоногт баруун болон зүүн аймгуудын нутгийн хойд хэсэг, төв болон говийн аймгуудын ихэнх нутгаар 0.1-32.0 мм бороо, дуу цахилгаантай аадар бороо орсон байна. Үүнээс хамгийн их нь Хэнтийн Дадалд 32.0 мм, Хөвсгөлийн Цагаан-Үүрт 24 мм, Эрдэнэбулганд 23 мм, Тариаланд 19 мм, Хэнтийн Гурванбаян, Булганы Баян-Агтад 21 мм, бороо, дуу цахилгаантай аадар бороо орсон байна.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
