АНУ-ын тээвэрлэгч хөлгийн тавцан дээрээс $60 саяын үнэтэй сөнөөгч онгоц тэнгисийн усанд унажээ

Улаан тэнгист байлдааны ажиллагаанд оролцож буй АНУ-ын флотын нисэх онгоц тээвэрлэгч USS Harry S.Truman хөлгийн тавцан дээрээс өчигдөр F/A-18 Super Hornet сөнөөгч онгоц тэнгисийн усанд унасан осол гарчээ.

Үүний улмаас нэг усан цэрэг гэмтсэн тухай АНУ-ын тэнгисийн хүчний удирдлагын төв мэдээлсэн байна.

Осолдсон сөнөөгч онгоцны өртөг $60 сая орчимд тооцогддог.

Уг онгоцыг ээлжит засвар үйлчилгээнд оруулахаар чирч байх үед жолоодлого алдагдсаны улмаас чирэгч машины хамт тавцан дээрээс унасан гэнэ.

Чирэгчийг жолоодож байсан усан цэргүүд унахаас өмнө үсэрч амжсан ч нэг нь хөнгөн гэмтсэн юм байна.

Ослын шалтгааныг тогтоох шалгалтын ажил эхэлснийг тэнгисийн хүчний удирдлага мэдээлжээ.

USS Harry S.Truman бол Ираны холбоотон Йемений босогчдын байрлалд агаарын цохилт өгөх ажиллагаанд оролцож буй АНУ-ын тэнгисийн флотын хоёр нисэх онгоц тээвэрлэгч хөлгийн нэг юм.

АНУ-ын зэвсэгт хүчин дээрх ажиллагааг гуравдугаар сарын 15-нд эхлүүлж байв.

Улаан тэнгисийн ажиллагааны үеэр хоёр дахь Super Hornet сөнөөгч осолдож байгаа нь энэ юм.

Арванхоёрдугаар сарын сүүлээр бас нэг ийм сөнөөгч онгоцыг АНУ-ын USS Gettysburg хөлгөөс харвасан пуужин санамсаргүй тохиолдлоор унагаж байжээ.

Эх сурвалж: Business Insider