DeepSeek хувийн мэдээллийг “зөвшөөрөлгүй цуглуулдаг” гэсэн дүгнэлтийг Өмнөд Солонгосын хяналтын байгууллага гаргажээ

Хятадын стартап компанийн бүтээсэн DeepSeek хиймэл оюунт чат платформ хэрэглэгчдийнхээ хувийн мэдээллийг зөвшөөрөлгүй цуглуулдгийг судалж тогтоосноо Өмнөд Солонгосын мэдээллийн аюулгүй байдлыг хамгаалах байгууллага өчигдөр зарлажээ.

DeepSeek платформын R1 хувилбар энэ оны эхээр АНУ-ын зах зээлд нэвтрэхдээ дэлхий дахиныг шуугиулж байсан юм.

OpenAI, Google зэрэг Америкийн өрсөлдөгч компаниудын хиймэл оюуны технологид зарцуулдаг хөрөнгө оруулалтын өчүүхэн хэсгээр буюу ердөө $6 сая орчмоор бүтсэн нь үүний гол шалтгаан байлаа.

Гэхдээ нөгөө талаар дэлхийн зарим улс орнууд DeepSeek-ийн тархалт мэдээллийн аюулгүй байдалд нь заналхийлэхээс болгоомжилж байв.

Тэдний нэг Өмнөд Солонгос улс хоёрдугаар сард шалгалт явуулах зорилгоор DeepSeek аппликэйшнийг өөрийн иргэдийн гар утсанд суулгахыг түр хориглосон юм.

Тус улсын Хувийн Мэдээллийг Хамгаалах Хорооны шалгалтын хэсгийн ахлагч Нам Сок хэрэглэгчдийн хүсэлтүүд, төхөөрөмжийн болон сүлжээний мэдээллүүдийг DeepSeek аппликэйшн Хятадын нийслэл Бээжинд үйл ажиллагаа явуулдаг Volcano Engine нэртэй cloud серверт хадгалж буйг тогтоосноо мэдээлсэн байна.

Эндээс цааш олж авсан мэдээллээ Хятадын болон АНУ-ын хэд хэдэн компанид дамжуулж байсныг шалгалтын явцад тогтоожээ.

DeepSeek компанид зөрчлийнх нь талаар анхааруулахад “Өмнөд Солонгосын мэдээллийн аюулгүй байдлын хууль тогтоомжуудыг хангалттай судлаагүйгээ хүлээн зөвшөөрч, асуудлыг шийдвэрлэхийн тулд хамтран ажиллах хүсэлтэй байгаагаа” илэрхийлсэн тухай Нам Сок хэвлэлийн хурлын үеэр сэтгүүлчдэд мэдээлсэн байна.

Өчигдрийн хэвлэлийн хурлын дараа Хятадын гадаад хэргийн яамны хэвлэлийн төлөөлөгч Гуо Жякинь “Ямар ч компани болон хувь хүмүүст бусдын мэдээллийг хууль бус аргаар цуглуулах, хадгалахыг бид хэзээ ч зөвшөөрч байгаагүй, цаашдаа ч зөвшөөрөхгүй” гэж мэдэгджээ.

Эх сурвалж: Aljazeera