Хятадын BYD компани 5 минутын цэнэглэгч танилцуулсны дараа хувьцааны ханш нь огцом өслөө

Уржигдар буюу Даваа гарагийн орой Хятадын үйлдвэрлэгч BYD компани автомашины шатахууны савыг бензинээр дүүргэхтэй ижил хугацаанд буюу 5 минутын дотор цахилгаан автомашины батарейг бүрэн цэнэглэдэг системээ зах зээлд танилцуулсан байна.

“Super e-Platform” гэж нэрлэсэн уг систем нь батарей цэнэглэх хурдыг 1,000 kW хүргэж чаджээ.

Ингэснээр дотоод шаталтын хөдөлгүүрээс цахилгаан хөдөлгүүрт автомашинд шилжихэд гол саад болж буй асуудлыг шийдвэрлэх боломжтой болсноо BYD компанийн үүсгэн байгуулагч Ван Чуаньфу мэдэгдсэн байна.

“Бидний зорилго бол цахилгаан автомашины цэнэглэх хугацааг шатахуунаар ажилладаг автомашины цэнэглэгдэх хугацаатай ижил түвшинд хүргэх юм” гэж тэр хэлжээ.

Үүний үр дүнд өчигдөр Хонконгийн хөрөнгийн бирж дээр BYD компанийн хувьцааны ханш зургаа гаруй хувиар өсөж, түүхэн дээд хэмжээндээ хүрсэн юм.

BYD компанийн гол өрсөлдөгч Tesla компанийн Supercharger систем 500 kW-ийн хурдаар автомашины батарейг цэнэглэдэг.

Шинэ системтэйгээ нийцэж ажиллах анхны автомашинууд болох Han L седан, Tang L SUV загваруудыг BYD бас танилцуулсан юм.

Эдгээр нь бүрэн цэнэгээрээ 470 км хүртэл зам туулах чадвартай.

BYD компани бас шинэ цэнэглэгчээ Хятад даяар 4,000 гаруй цэгт суурилуулах төлөвлөгөөг зарлажээ.

Тус компанийн хоёрдугаар сарын борлуулалт 318,000 гаруй ширхэгт хүрч, өмнөх оны мөн үеэс 161 хувиар өссөн юм.

Ижил хугацаанд Tesla компанийн Хятадын зах зээлд дэх борлуулалтын хэмжээ 49 хувиар унажээ.

Эх сурвалж: AFP