"Тавантолгой түлш" ХХК долоон жилийн хугацаанд шахмал түлшний шуудай худалдан авахад ₮83 тэрбумыг зарцуулжээ

Гэрэл зургийг MPA агентлагийн онцгой зөвшөөрөлтэйгөөр ашиглав

"Утааны асуудал: Эрх зүйн орчин, бодлого, шийдвэрийн хэрэгжилт, санхүүжилт, зарцуулалт, хариуцлага" сэдэвт хэлэлцүүлэг Төрийн ордонд болж байна. 

Энэ үеэр "Тавантолгой түлш" ХХК-ийн байгуулагдсанаас хойших долоон жилийн үзүүлэлт мэдээллийг тус компанийн Төлөвлөлт, эдийн засгийн хэлтсийн дарга Х.Ариунзаяа танилцуулсныг хүргэж байна. 

Тэрбээр "Тавантолгой түлш ХХК нь "Эрдэнэс Монгол" ХХК-ийн ТУЗ-ийн 2018 оны 23 дугаар тогтоолын дагуу байгуулагдсан. 2018-2024 оны хугацаанд Засгийн газрын тогтоол болон тэмдэглэлээр харьяа байгууллага, толгой компаниар дамжуулж 1.4 их наяд төгрөгийн санхүүжүүлэлтийг авсан.

 

Манай компани нийт 1.7 их наяд төгрөг зарцуулсны 371.5 тэрбум төгрөг нь хөрөнгө оруулалтад, 1.3 их наяд төгрөгийг шахмал түлшний үйлдвэрлэлийн үйл ажиллагаанд зориулагдсан байна.

 

2018-2024 оны байдлаар хөдөлмөрийн зардалд 400 тэрбум төгрөг, барьцалдуулагчийн зардалд 321 тэрбум, тээврийн зардалд 223.3 тэрбум, шуудайд 83 тэрбум төгрөгийг зарцуулсан байна. Давхардсан дүнгээр нийт 18,464 хүнд 400 тэрбум төгрөгийн хөрөнгийн зардал гаргаж ажиллажээ. 

 

 

2024 оны байдлаар нэг тонн сайжруулсан шахмал түлш үйлдвэрлэхэд 598,900 төгрөгийн өртөг шингэж байна. Энэ тоо 2019-2021 онд маш бага буюу 358 мянган төгрөг орчим гарч байсан. Яагаад гэвэл бараа материал зарцуулалтыг дутуу тайлагнасан, элэгдлийн зардлыг бүрэн тооцоогүй, бүтээгдэхүүний өртгийг мөнгөн сууриар тооцсон төсвийн программгүй байсантай холбоотой. 

2022 оноос санхүүгийн программаа шинэчилснээр нэг тонн шахмал түлш үйлдвэрлэхэд гарч буй өртгийг бүрэн тооцож эхэлсэн. 2024 оны жилийн эцсийн байдлаар нэг тонн шахмал түлш үйлдвэрлэхэд гардаг өртөг нь борлуулж буй үнийн дүнгээс дөрөв дахин өндөр байгаа юм. 2024 оны байдлаар нэг тонн шахмал түлш 666,000 төгрөгөөр хэрэглэгчийн гарт хүрч байгаа. 

 

Эрх зүйн асуудлын хувьд өнгөрсөн долоон жилийн хугацаанд нийт 145 хэрэг маргаан үүссэн. Үүний 92 хувь нь иргэний, 2.1 хувь нь гэм хорын, 2.8 хувь нь хөдөлмөрийн болон захиргааны хэрэг маргаан байгаа" гэв.