"Сант сургуулиас намайг 11 жилийн турш эрүүгийн хэрэгт хэлмэгдүүлснийхээ хохирлыг барагдуул гэж шаардаж байна"
Сант сургуулийн өргөтгөлийн барилгыг 2013 онд барьсан “Бүрэн цутгамал” компаниас Сант сургуулийн удирдлагуудын буруутай үйлдлийн улмаас хохирсон талаараа өнөөдөр мэдээлэл хийлээ.
Бүрэн цутгамал" ХХК-ийн захирал Б.Батдэлгэр "Би 2013 оноос хойш барилгын салбарт ажиллагсдын хөдөлмөрийг шударгаар үнэлэхийн төлөө тэмцэл хийж байна.
Би 1999-2007 оны хооронд БНСУ-д барилга угсралтын чиглэлээр ажиллаад бүрэн цутгамал буюу хайрцагт бүтээц хийц технологийг 2007 онд монгол улсад нэвтрүүлж, тус ондоо "Бүрэн цутгамал" компаниа байгуулсан. 2007-2015 он хүртэл Улаанбаатар хотод Твин парк, Азмон оффис, Кристал таун, Эмиралд таун, Эмбаси товер, Эмиралд ресиденс зэрэг нийт 250,000м.кв, 5,000 айлын бүрэн цутгамал орон сууцны хорооллуудыг барьж гүйцэтгэсэн байдаг.
"11 жилийн дараа шударга үнэнийг тогтоосон шүүхэд баярлалаа"
2013 онд Сант сургуулийн өргөтгөлийн барилгыг барихаар гэрээ байгуулан барилгын ажлыг хийж гүйцэтгэж байсан боловч Сант сургуулийн зүгээс удаа дараалан гэрээгээ зөрчин ажлын хөлс, материалын зардлын үлдэгдлээ өгөлгүй 2013 оны аравдугаар сарын 25-ны өдөр манай компанийг барилгын талбайгаас хөөж явуулсан.
Уг үйлдэл буюу Сант сургууль гэрээгээ цуцалж, биднийг барилгын талбайгаас хөөж явуулсныг 11 жилийн дараа 2024 оны арваннэгдүгээр сард Монгол Улсын дээд шүүхээс тогтоолоо. Өмнө нь анхан шатны шүүх дөрвөн удаа хуралдахад манай Бүрэн цутгамал компанийг ажлаа хаяж явж, гэрээгээ цуцалсан гэж тогтоож байсан юм.
Иймд 11 жилийн дараа шударга үнэнийг тогтоосон Нийслэлийн иргэний хэргийн давж заалдах шатны шүүх, Монгол Улсын дээд шүүхийн иргэний танхимд баярлалаа гэж хэлэхийг хүсэж байна.
Сант сургуулийн зүгээс үлдэгдэл мөнгийг өгөхгүйн тулд биднийг барилгын талбайгаас хөөж гаргасныхаа дараа намайг залилан мэхэлсэн, нэр төр гутаасан, чанаргүй барилга барьсан зэрэг гэмт хэрэгт гүтгэсэн. Эцэст нь шүүхээс намайг эдгээр хэргүүдэд гэм буруугүйг нотолсон.
2016 онд намайг яллаж байсан боловч чанаргүй гээд байсан барилга нь чанартай барилга болоод улсын комисс хүлээж авсан. Нууцаар манай компанийн бичиг баримтыг иргэний шүүхээс хулгайлж авсан. Өөрөөр хэлбэл тухайн барилга дээр ширхэг тоосго өрөөгүй компанитай хуурамч огноотой гэрээ байгуулан улсын комисст өгсөн байдаг.
Сант сургуулийн өргөтгөлийн барилга дээр Бүрэн цутгамал компани 1.7 тэрбум төгрөгийн ажил хийж гүйцэтгэсэн. Үүнээс Сант сургуулиас 1.2 тэрбум төгрөгийг авсан. 2013 оны 500 сая төгрөг буюу тухайн үеийн ханшаар 400 мянга гаруй долларын ажлын хөлсөө авч чадаагүй явж байгаа юм. 2013 оны 400 мянган долларыг өгөхгүйн төлөө 11 жил намайг эрүүгийн хэрэгт гүтгэн иргэн, эрүүгийн шүүхээр дарамталж 11 жилийн дараа уг мөнгө нь 60 мянган доллар болж байна. Энэ нь Сант сургуульд ямар ашигтай байсныг харуулж байгаа юм.
Сант сургууль шиг захиалагч нар барилгачдын хөдөлмөрийг үгүйсгэсний хүчинд монгол улсад барилгачид байгаа юм уу?
Сант сургууль шиг захиалагч нар барилгачдын хөдөлмөрийг үгүйсгэн доромжилж, удаа дараалан эрүүгийн хэрэг үүсгэн дарамталж байсны хүчинд монгол улсад барилгачид байгаа юм уу?
Одоо манай компани дампуурчихсан. 2016 онд надад эрүүгийн хэрэг үүсгэж, яллагдагчаар татаад шүүхэд шилжүүлэн найман жилийн чанга дэглэмд яллах санал гаргаж, дараагийн шүүх хурлаар 5,2 жилээр, дараа нь 6 жилээр чанга дэглэмд яллах санал гаргуулж, Бүрэн цутгамал компанийн захирал байх эрхийг минь 2-3 жилээр хасах санал хүртэл гаргаж байсан. Ийм байхад хэн ажил хийж гүйцэтгэх юм бэ?
Сант сургуулийн захирал Зургаанжин 2013 оны аравдугаар сарын 24-ны өдөр над руу утсаар ярьж "Маргаашаас танайхыг оруулахгүй. Гомдолтой бол хууль шүүхийн байгууллагаар яв" гэсэн. Манай мөнгийг өгөхгүйн тулд хамаг хүнд хүчир ажлуудаа хийлгүүлчхээд зориуд барилгын талбайгаас хөөн гаргаж, манай компанийг гэрээгээ цуцалсан ажлаа хаяж явсан гэж тогтоох гэж улайран дайрсан.
Иймд одоо Сант сургуулийг иргэн Батдэлгэр болон Бүрэн цутгамал компанийг сэтгэл санаагаар хохироож, дээрэлхэж хэлмэгдүүлснийхээ төлөө уучлалт гуйхыг шаардаж байна. Сант сургуулийн захирал Зургаанжинг сургуулийнхаа гүйцэтгэх захирлын албан тушаалаас огцрохыг шаардаж байна. Хүнийг хэлмэгдүүлдэг хүн боловсролын салбарт байх эрхгүй гэж үзэж байна. Мөн дээд шүүхээс тогтоосон мөнгө болон манай компанийн 2013 оноос хойш олох ёстой байсан орлого, мөн эрүүгийн хэрэгт хэлмэгдүүлж, тарчлааж байсныхаа хохирлыг барагдуул гэж шаардаж байгаа" гэв.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
56 СЭТГЭГДЭЛТЭЙ
|
