Өмнөд Солонгосын аялал жуулчлалын салбарын тэнцэл гурван сар дараалан ашигтай гарчээ

Өнгөрсөн тавдугаар сард Өмнөд Солонгосын аялал жуулчлалын салбарын тэнцэл гурав дахь сардаа дараалан ашигтай гарсныг тус улсын засгийн газар Ням гарагт мэдээлжээ.

Энэ нь тус улсад ирэх гадаадын жуулчдын тоо нэмэгдэж, эсрэгээрээ гадаадад аялах солонгос хүмүүсийн тоо буурсан гэсэн үг юм.

БНСУ-ын Аялал Жуулчлалын Байгууллагын танилцуулсан тоо баримтаас үзвэл тавдугаар сард салбарын тэнцэл $220.5 саяын ашигтай гарсан нь жилийн өмнөх мөн үеийн $820.2 саяын алдагдалтай харьцуулахад эрс өссөн үзүүлэлт болжээ.

Салбарын тэнцэл 2020 оны гуравдугаар сараас хойш дараалан 72 сар алдагдалтай байсан бол энэ оны гуравдугаар сард $263.8 саяын ашигтай гарч, алдагдлын цувралыг зогсоосон юм.

Тавдугаар сард гадаадын жуулчдын зарцуулсан мөнгөний хэмжээ $2.58 тэрбум, солонгосчуудын гадаад аялалд зарцуулсан мөнгөний хэмжээ $2.36 тэрбум байжээ.

Энэ нь гадаадын жуулчин бүр Өмнөд Солонгост дунджаар $1,324-ийг, солонгос хүн бүр гадаадад дунджаар $1,007-ыг зарцуулсан гэсэн үг юм.

Тавдугаар сард Өмнөд Солонгост гадаадын 1.95 сая жуулчин ирсэн нь жилийн өмнөх мөн үеэс 19.4 хувиар өссөн тоо болжээ.

Харин гадаадад аялсан Өмнөд Солонгосын иргэдийн тоо жилийн өмнөх 2.34 саяас 2.1 хувиар буурсан байна.

“Сүүлийн саруудад гадаад жуулчдын тоо огцом нэмэгдсэн нь ‘Korean Wave’ кампани улам бүр анхаарал татаж, воны ханш суларсантай холбоотой. Үүнтэй зэрэгцээд Ойрх Дорнодын мөргөлдөөнөөс үүдэлтэй агаарын тээврийн үнийн өсөлт Өмнөд Солонгосын иргэдийг гадаадад аялахаас татгалзахад хүргэж байна” гэж Ханян Их сургуулийн аялал жуулчлалын профессор Ким Нам Жо дүгнэжээ.

Эх сурвалж: Yonhap News