Монгол Улсын гавьяат тамирчин С.Цэрэнчимэд улсын аварга боллоо

Энэ сарын 20-ноос 22-ныг дуустал “Москва 1980” олимпын хүрэл, “Мехико 1978” Дэлхийн Аварга Шалгаруулах Тэмцээн (ДАШТ)-ий хүрэл медальт, Монгол Улсын Аваргад хамгийн олон буюу 12 удаа түрүүлсэн гавьяат тамирчин Д.Оюунболдын нэрэмжит чөлөөт бөхийн 2025 оны Улсын Аварга Шалгаруулах Тэмцээн (УАШТ) өнөөдөр Монгол Бөхийн Өргөө (МБӨ)-д нээлтээ хийлээ.

Тэмцээний эхний өдөр эмэгтэйчүүдийн 53 кг, 62 кг, 76 кг, эрэгтэйчүүдийн 57 кг, 61 кг, 65 кг, 70 кг-д медальтнуудаа тодруулж байна.

Эмэгтэйчүүдийн 62 кг-ын жинд Монгол Улсын гавьяат тамирчин П.Орхон, С.Цэрэнчимэд нар шигшээд үлдсэн юм.

Уг барилдаанд С.Цэрэнчимэд 16:14-өөр өрсөлдөгчөө ялснаар улсын аварга боллоо. 

Тэд өнгөрсөн жил УАШТ-ий финалд таарахад П.Орхон ялж байв. 

Тэгвэл энэ удаад С.Цэрэнчимэд ялснаар улсын аваргад долоо дахь түрүүгээ хүртэж байна.