PUBGM: Falcons Force болон IHC Esports багийн ДАШТ-ий лигийн шатны тоглолтууд өнөөдөр эхэлнэ
Цахим спортын PUBG MOBILE тоглоомын дэлхийн аварга шалгаруулах тэмцээн (PMGC 2024 )-ий лигийн шатанд шалгарсан 48 багийн тоглолтууд аравдугаар сарын 31-нээс энэ сарын 24-н хүртэл Малайз улсад зохион байгуулагдах билээ.
Нийт гурван сая ам.долларын шагналын сантай тус тэмцээнд манай улсаас 4Merical Vibes, Falcons Force, IHC Esports, Stalwart Esports гэсэн багууд оролцож байгаа юм. Тэгвэл Falcons Force болон IHC Esports багийн лигийн шатны тоглолтууд өнөөдөр 19:00 цагийн үед эхлэх гэж байна.
Манай улсын тус хоёр баг лигийн шатны "Улаан" хэсэгт хуваагдсан бөгөөд дөрвөн өдрийн турш нийт 24 тоглолт хийнэ. "Улаан" хэсгийн хүснэгтийн эхний гурван байрт бичигдэж чадвал дэлхийн аваргын сүүлийн шат буюу "Grand Finals"-д тоглох эрхтэй болно. Хэрэв 4-11 дүгээр байрт бичигдвэл "Survival Stage"-ээс тэмцээнийг үргэлжлүүлнэ.
Энэ тоглоомын дэлхийн аварга нь "Group Stage", "Survival Stage", "Last Chance", "Grand Finals" гэсэн дөрвөн шаттай явагддаг. Эхний гурван шатнаас шалгарсан 16 баг арванхоёрдугаар сарын 6-8-нд Лондон хотод "Grand Finals"-ийн 18 тоглолтыг хийснээр дэлхийн аварга баг тодрох юм.
"Group Stage" шатны 48 баг гурван хэсэгт хуваагдан тоглоно. Гурван хэсгийн эхний гурван байрт шалгарсан багууд дэлхийн аваргын сүүлийн шатанд тоглох эрх авна. Харин гурван хэсгийн 4-11 дүгээр байрт бичигдсэн 24 баг "Survival Stage" шатанд тоглож, 16 нь "Last Chance" шат руу дэвшинэ.
"Last Chance" шатны эхний зургаан байрт шалгарсан багууд ирэх сард Лондон хотыг зорих эрхтэй болно.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
